ނޫސްވެރިކަމުގެ ޓެގް އަޅުވައިގެން ފިތުނަ އުފައްދަން މަސައްކަތް ނުކުރުމަށް ރައީސް އޮފީހުގެ ތަރުޖަމާނު ހީނާ ވަލީދު ގޮވާލައިފި އެވެ.
ހީނާ މިކަމަށް ގޮވާލާފައިމިވަނީ ރައީސް ޑރ. މުހައްމަދު މުއިއްޒުގެ މާސްޓަޕްލޭން އެކުލަވާލުމުގެ މަސައްކަތް ފެށުމަށް އަންނަ ހަފުތާގައި އަގު ބޮޑު ހަފުލާއެއް ބޭއްވުމަށް ނިންމާފައިވާ ކަމަށް ބުނެ "އަދަދު" ނޫހުން ރިޕޯޓުކޮށްފައިވާ ހަބަރަކާއި ގުޅިގެންނެވެ.
މި ހަބަރާއި ގުޅިގެން ހީނާ ވިދާޅުވީ އެ ހަފްލާ އަކީ ގާތްގަނޑަކަށް ދެލައްކަ ރުފިޔާއަށްވުރެ ވެސް ކުޑަ ބަޖެޓަކުން މުޅި ރާއްޖެ ޝާމިލުވާ ގޮތަށް ހިންގަން ރާވަމުން އަންނަ ކަމެއް ކަމަށެވެ.
ވޭތުވެދިޔަ އަހަރެއްހާ ދުވަހުގެ ތެރޭގައި އަދަދު ނޫހުން މިފަދަ އެތައް ދޮގު މަޢުލޫމާތެއް ގަސްތުގައި ފަތުރާފައިވާ ކަމަށް ހީނާ ވަނީ ތުހުމަތު ކުރައްވާފަ އެވެ.
"މިނިވަން ނޫސްވެރިކަމުގެ ޓެގް އަޅުވައިގެން މި ޤައުމުގައި ދޮގު މަޢުލޫމާތު ފަތުރާ، ފިތުނަ ފަސާދަ އުފެއްދުމަށް މަސައްކަތް ނުކުރުމަށް އިލްތިމާސްކުރަން،" ހީނާ ވިދާޅުވި އެވެ.
މި ސަރުކާރުގެ މެނިފެސްޓޯގައި 20 އަހަރު ދުވަހުގެ ގައުމީ ތަރައްގީގެ ޕްލޭނެއް އެކުލަވާލުން ހިމަނާފައިވެ އެވެ. އެގޮތުން ދާދިފަހުން ބޭއްވި ވަޒީރުންގެ މަޖިލީހުގެ ބައްދަލުވުމުގައި ވަނީ މި ޕްލޭން ހެދުމުގެ މަސައްކަތް ފަށައި، އެއް އަހަރު ތެރޭ އެ ޕްލޭން އެކުލަވާލަން ނިންމާފަ އެވެ.
އެ މަސައްކަތާއި ގުޅޭ އިތުރު ތަފްސީލުތައް ހާމަކުރައްވަމުން ރައީސް ޑރ. މުހައްމަދު މުއިއްޒު ވިދާޅުވީ ގައުމީ ތަރައްގީގެ ޕްލޭނުގެ މަސައްކަތް އެއް އަހަރު ތެރޭ ނިންމާނީ ރައްޔިތުންގެ ފުރިހަމަ ބައިވެރިވުން ހިމެނޭ ގޮތަށް ކަމަށެވެ.
"ހުރިހާ ސިޔާސީ ޕާޓީތަކާއި ޖަމިއްޔާ ޖަމާއަތްތަކާއި، އެކިއެކި ސްޓޭކް ހޯލްޑަރުންނާއި އެކިއެކި އެކްސްޕާޓުން ހިމެނޭ ގޮތަށް ވަރަށް ފުރިހަމަ ބައިވެރިވުމާއި މަޝްވަރާއާ އެކީގައި ގައުމީ ތަރައްގީގެ މާސްޓާ ޕްލޭނެއް ކުރިއަށް އޮތް 20 އަހަރު ދުވަހަށް އެކުލަވައިލުމުގެ މަސައްކަތް މި ފަށަނީ،" ރައީސް ވިދާޅުވި އެވެ.
ރައީސް ވިދާޅުވީ އެ ޕްލޭނަށް ގާނޫނީ ހިމާޔަތްތެރިކަން ދިނުމުގެ ގޮތުން ގާނޫނުއަސާސީއަށާއި ގާނޫނުތަކަށް ގެންނަންޖެހޭ އިސްލާހުތައް ގެނެސް އަދި ހާއްސަ ވަކި ގާނޫނެއް އެކުލަވައިލައްވާނެ ކަމަށެވެ. މީގެ މަގުސަދަކީ ރައްޔިތުންގެ ބައިވެރިވުމާއެކު އެކުލަވާލާ 20 އަހަރު ދުވަހުގެ ތަސައްވުރަކީ އެއަށް ރައްޔިތުންގެ ޔަގީންކަން އޮންނަ ކަމަކަށް ހެދުން ކަމަށްވެސް ރައީސް ވިދާޅުވި އެވެ.