އައިވީއެފް މެދުވެރިކޮށް ދަރިން ހޯދުމުގެ ފުރުސަތު އިތުރު 63 މީހަކަށްދީ، އެ މިހުންގެ ލިސްޓް ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން އާންމުކޮށްފި އެވެ.
އެންސްޕާއިން އިއްޔެ ގެޒެޓުކުރި އިއުލާނަކާ އެކީ އާސަންދައިގެ ދަށުން އައިވީއެފްގެ ފަރުވާ ހޯދުމަށް އެދި ހުށަހެޅި މީހުންގެ ތެރެއިބް ފރުސަތު ލިބުނު މީހުންގެ ލިސްޓްގެ އިތުރުން ޝަރުތު ހަމަ ނުވި މީހުންނާއި އޭގެ ސަބަބުން ވެސް ހިއްސާކޮށްފައިވެ އެވެ.
އެންސްޕާ އިން މިހާރު ވަނީ ލިސްޓަށް ޝަކުވާ ހުށަހެޅުމުގެ ފުރުސަތު ވެސް ހުޅުވާލައިފަ އެވެ. އެގޮތުން ޝަކުވާއެއް އޮތް ނަމަ މި މަހުގެ 10 ގެ މެންދުރު ފަހު 2:00 ގެ ކުރިން މި މެއިލް އަށް ޝަކުވާ ފޮނުވަން އެދިފައިވެ އެވެ.
އެންސްޕާ އިން ބުނީ ޝަކުވާތަކަށް ބެލުމަށް ފަހު ލިސްޓަށް ބަދަލެއް ގެންނަން ޖެހޭ ނަމަ، އެ ބަދަލެއް ގެނައުމަށް ފަހު މި މަހުގެ 15، ގައި ދާއިމީ ލިސްޓު އިއުލާނު ކުރާނެ ކަމަށެވެ. އަދި ފުރުސަތު ލިބުނު މީހުންނަށް ފަރުވާ ކުރިއަށް ދާނެ ގޮތުގެ ޕްލޭން މި މަހުގެ 30 ގެ ކުރިން ހިއްސާ ކުރާނެ އެވެ.
ސަރުކާރުން ނިންމާފައި ވަނީ އާސަންދައިގެ ދަށުން އައިވީއެފްގެ ފަރުވާ 100 ދެމަފިރިއަކަށް ދިނުމަށެވެ. އެގޮތުން މިދިޔަ ޖުލައި މަހު ވެސް 37 މީހަކަށް އެ ފުރުސަތު ދީފައިވެ އެވެ.