ޤައުމު ތަރައްޤީކޮށް ކުރިއެރުވުމުގައި އެކި ޚިޔާލުތަކާއި، އެކި ފިކުރުތަކާއެކީގައި މަޝްވަރާކޮށްގެން ނޫނީ އެންމެ ރަނގަޅު މިސްރާބަކަށް ނުދާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެ އެވެ.
ކޮޅުމަޑުލު އިސްރަށްވެހިންގެ މަހާސިންތާ 2024 ހުޅުވައިދެއްވުމަށް ރޭ ވޭމަންޑޫގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ މަލްޓި ޕާޓީ ޑިމޮކްރަސީގައި، ތަފާތު ފިކުރުގެ އެކި ވިސްނުމުގެ ބޭފުޅުންގެ ޚިޔާލާއި މަޝްވަރާއަކީ ބޭނުންތެރި މަޝްވަރާއެއް ކަމަށެވެ. އަދި މިފަދަ މަހާސިންތާތަކުގައި މަޝްވަރާކުރެވި ޚިޔާލުފުޅުތައް އެއް ގޮތް ކުރުމަކީ ގިނަ ޕާޓީ އެކުލެވޭ ޑިމޮކްރެސީގައި ވަރަށް މުހިންމު ކަމެއް ކަމަށް ވެސް ވިދާޅުވި އެވެ.
މިނިސްޓަރު ވިދާޅުވީ ކަތީބުންނާއި، އަތޮޅުވެރީން ރާއްޖެއަށް ދެން ނާންނާނެ ކަމަށެވެ. ވިދާޅުވިއެވެ. އަދި ކުރިން ދެއްކި ކަތީބުންނާއި، އަތޮޅުވެރީންގެ ވާހަ އަކީ މަލްޓި ޕާޓީ ޑިމޮކްރަސީގައި މިހާރު އެއް ގޮތަކަށް ވެސް ދިވެހިންގެ ތެރޭގައި ދައްކާ ވާހަކައެއް ނޫން ކަމަށް ވެސް ވިދާޅުވިއެވެ.
"އެންމެ ފަހުން ޤައުމީ ޔުނިވސިޓީން ހެދި ދިރާސާއިން ވެސް ފެނިގެން ދިޔައީ ލާމަރުކަޒީ ނިޒާމު ދިވެހި ރައްޔިތުން ބަލައިގެންފިކަން،" އޭނަ ވިދާޅުވި އެވެ. "ރާއްޖޭގެ ވެރިކަން ލާމަރުކަޒީ ނިޒާމާ އެއް ގޮތަށް އޮންނަން ޖެހޭ ކަން. އެހެންވީމާ ރާއްޖޭގައި އޮންނާނީ ލާމަރުކަޒީ ނިޒާމު."
މިނިސްޓަރު ވިފާޅުވީ ލާމަރުކަޒީ ނިޒާމުގައި ޚިދުމަތް ފޯރުކޮށް ދިނުމަށް ރައްޔިތުންގެ ތެރެއިން ބަސްބުނަން ތިބި ބަޔަކީ ކައުންސިލަރުން ކަމަށެވެ. އަދި އެ މަޤާމު ހޯދުމަށް ކައުންސިލަރުން މަސައްކަތްކުރަން ޖެހޭ ކަމަށް ވެސް ވިދާޅުވި އެވެ. އަދިހަމައެއާއެކު މަޤާމުގެ ހައިޞިއްޔަތުން ކައުންސިލަރުން ދަމަހައްޓަންވީ މަޤާމުގެ ކަންކަން ކުރިއަށް ގެންދަންވީ ގޮތް ދެނެގަނެ، ކަންކަން ކުރަންޖެހޭ ގޮތާ ބެހޭ ގޮތުން ފުންކޮށް ވިސްނާ މަޝްވަރާކުރުމަށް މަހާސިންތާތައް މުހިންމު ކަމަށް ވިދާޅުވި އެވެ.