އިޒްރޭލުން ފަލަސްތީނުގެ ގާޒާގައި ބޮޑު ގަތުލްއާންމެއް ހިންގައި އިއްޔެ 84 މީހަކު ޝަހީދުކޮށްލައިފި އެވެ.
އިޒްރޭލުން މި ގަތުލްއާންމު ހިންގާފައިވަނީ ގާޒާގެ އުތުރުގައި މީހުން ދިރިއުޅޭ ދެ އިމާރާތަކަށް ދިން ހަމަލާތަކެއްގަ އެވެ. މި ހަމަލާތަކުގައި ޝަހީދުވި މީހުންގެ ތެރެއިން 50 އަށް ވުރެ ގިނަ މީހުންނަކީ ކުޑަކުދިން ކަމަށް ގާޒާގެ ކަމާބެހޭ އިދާރާތަކުން ބުނެ އެވެ.
މި ހަމަލާތައް އިޒްރޭލުން އަމާޒުކުރި އިމާރާތްތަކުގައި ގާތްގަނޑަކަށް 170 މީހުން ދިރިއުޅެމުންދިޔަ ކަމަށް ރިޕޯޓުތައް ބުނެ އެވެ.
އިޒްރޭލުން ހުއްޓުމެއް ނެތި ގާޒާގެ އުތުރުގެ ހިސާބުތަކަށް ހަމަލާތައް ދެމުންދާތީ އެ ސަރަހައްދަށް ސިއްހީ ފަރުވާގެ އެހީތެރިކަން ފޯރުކޮށްދިނުމުގައި ވެސް ބޮޑެތި ހުރަސްތަކެއް ވަނީ ކުރިމަތިވެފަ އެވެ.
އިޒްރޭލުން ފަލަސްތީނަށް ހަމަލާދޭން ފެށީ މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ކަމަށްވާއިރު، އެ ހަމަލާތަކުގައި 43،000 އަށް ވުރެ ގިނަ މީހުން ވަނީ ޝަހީދުވެފަ އެވެ. އޭގެތެރެއިން ގިނައީ ކުޑަކުދިންނާއި އަންހެނުންނެވެ. ހަމަލާތަކުގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ވަނީ ގޮސްފަ އެވެ. އަދި ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.
ގާޒާގެ އިތުރުން އިޒްރޭލުން އަންނަނީ ލުބްނާނުގެ އެކި ސަރަހައްދުތަކަށް ވެސް ހުއްޓުމެއް ނެތި ހަމަލާތައް ދެމުންނެވެ.