އިންޑިއާގެ މަޝްހޫރު ފެޝަން ޑިޒައިނަރު ރޯހިތު ބާލް މަރުވެއްޖެ އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ހާޓްއެޓޭކެއް ޖެހިގެން އޭނަ މަރުވީ އިއްޔެ އެވެ. މިދިޔަ އަހަރުގެ ތެރޭގައި ވެސް ހާޓްއެޓޭކެއް ޖެހުނު ފަހުން ރޯހިތު އުޅުނީ ވަރަށް ބަލިކޮށެވެ. ނިއު ދިއްލީގައި އޭނަ މަރުވި އިރު، އުމުރަނީ 63، އެވެ.
ރޯހިތުގެ މަރާ ގުޅިގެން ބޮލީވުޑްގެ ވަރަށް ގިނަ ފިލްމީ ތަރިން ވެސް ސޯޝަލް މީޑިއާގައި ހިތާމަ ފާޅުކޮށްފައިވެ އެވެ.
ދެ ޖިންސްގެ މީހުންގެ ހެދުންތައް ޑިޒައިން ކުރަމުން އައި ނުފޫޒު ގަދަ ޑިޒައިނަރު މަރުވި އިރު، އޭނަގެ ކަލެކްޝަންތަކެއް އެންމެ ފަހުން ދައްކައިލީ މިދިޔަ މަހު ބޭއްވި ލަކްމޭ ފެޝަން ވީކްގަ އެވެ. ރޯހިތަކީ މަޝްހޫރު ފިލްމީ ތަރި އަމީތާބް ބައްޗަންް ސޮނީ ޓީވީ އަށް ހޯސްޓްކޮށްދޭ ޝޯ، "ކޯން ބަނޭގާ ކަރޯޑްޕަތީ" ގެ ޑިޒައިނަރެވެ.
އޭނަގެ މަރާ ގުޅިގެން ފެޝަން ޑިޒައިން ކައުންސިލް އޮފް އިންޑިއާ (އެފްޑީސީއައި) އިން ނެރުނު ބަޔާނެއްގައި ބުނީ ވަކިވެ ދިޔައީ ވަރަށް އަގުހުރި ހިދުމަތްތެރި ކަމަށާއި އިންޑިއާގެ ފެޝަނުގެ ދުނިޔެ އަށް މިއީ ވަރަށް ބޮޑު ފަޅުކަމަކަށް ވާނެ ކަމަށެވެ.
ކަޝްމީރުގެ ސްރީނަގަރަށް އުފަން ރޯހިތު ފެޝަން ޑިޒައިނިންގެ ތެރެއަށް ނުކުތީ 1986 ގަ އެވެ. އަދި އެކަމަށް ހާއްސަ ކުންފުންޏެއް އޯކިޑް އޯވަސީސް ޕްރައިވެޓް ލިމިޓްގެ ނަމުގައި ގެންދިޔައީ ހިންގަމުންނެވެ.