ރާއްޖޭގެ ބޯޑަރުތަކުގެ ސިއްހީ ގާބިލުކަން އިތުރުކުރުމަށް ސިއްޙީ އާލާތްތަކެއް އައްޑޫ ގަން އެއާޕޯޓަށް ހަދިޔާކޮށްފި އެވެ.
އެ ތަކެތި ހަދިޔާކޮށްފައި ވަނީ ޖަޕާން ސަރުކާރާއި އިންޓަނޭޝަނަލް އޮގަނައިޒޭޝަން އޮފް މައިގްރޭޝަން، (އައިއޯއެމް) ގުޅިގެންނެވެ.
ގަން އެއާޕޯޓްގެ ވިއައިޕީ ލައުންޖްގައި ބުރާސްފަތި ދުވަހު ބޭއްވި ހަފުލާއެއްގައި އެއާޕޯޓްގެ ފަރާތުން ތަކެއްޗާ ހަވާލުވެވަޑައިގަތީ ގަން އެއާޕޯޓް ހިންގާ ކުންފުނި، އައްޑޫ އިންޓަނޭޝަނަލް އެއާޕޯޓް (އޭއައިއޭ) ގެ ޗެއާމަން އަހުމަދު އަޒާން އާއި އައްޑޫ މޭޔަރު އަލީ ނިޒާރެވެ.
ޖަޕާންގެ ފަރާތުން ތަކެތި ހަވާލުކޮށް ދެއްވީ އެ ގައުމުން ރާއްޖެ އަށް ކަނޑައަަޅާފައި ހުންނަވާ ސަފީރު ޓަކޫޗީ މިޑޯރީ އެވެ.
އައިއޯއެމް އާއި ޖަޕާން ސަރުކާރުން ހަދިޔާކުރި އާލާތްތަކުގެ ސަބަބުން ދިވެހިންނާއި ރާއްޖެ އެތެރެވާ މީހުންގެ ސަލާމަތާއި ރައްކާތެރިކަން ކަށަވަރު ކުރުމަށް އެހީވެދޭނެ އެވެ. އެ އާލާތްތަކުގެ ތެރޭގައި ޑިޖިޓަލް ފުލް ބޮޑީ ސްކޭނަރާއި ފުލީ އިކުއިޕްޑް އެމްބިއުލާންސާއު، ޕޯޓް ހެލްތުގައި ބޭނުންކުރުމަށް ވެހިކަލްތަކާއި، މެޑިކަލް އެހެން ބައެއް އިކުއިޕްމަންޓްތައް ހިމެނެ އެވެ.
މި މިޕްރޮޖެކްޓްގެ އަގަކީ 8.4 މިލިއަން ޑޮލަރެވެ.
މި ޕްރޮޖެކްޓްގެ ދަށުން ގަން އެއާޕޯޓާ ތަކެތި ހަވާލުކުރުމުގެ ކުރިން މިދިޔަ މަހުގެ 30 ގައި ވެލާނާ އިންޓަނޭޝަނަލް އެއާޕޯޓް (ވީއައިއޭ) ހިންގާ ކުންފުނި، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ވެސް ތަކެތި ހަވާލުކޮށްފައިވެ އެވެ.