ބޮލީވުޑްގެ މަޝްހޫރު ދެމަފިރިން ކަމަށްވާ ރަންވީރު ސިންގް އާއި ދީޕިކާ ޕަދްކޯންގެ ދަރިފުޅުގެ ނަން އާންމުކޮށްފި އެވެ.
އިންޑިއާގައި މިހާރު ފާހަގަކުރަމުން އަންނަ ދިވާލީ ފެސްޓިވަލާ ގުޅުވައި ދަރިފުޅުގެ ފައި ފެންނަ ފޮޓޯއަކާ އެކީ ދީޕިކާ އިއްޔެ އިންސްޓަގްރާމްގައި ބުނީ ދަރިފުޅުގެ ނަމަކީ ދުއާ ޕަދްކޯން ސިންގް ކަމަށެވެ. ދަރިފުޅަށް ދުއާ ކިޔުމާ ބެހޭ ގޮތުން އޭނަ ބުނީ އެ އެ ނަމަކީ ކުއްޖަކަށް އެދި ކުރި ދުއާގެ އިޖާބަ ކަމަށްވާތީ ކަމަށެވެ.
ދީޕިކާ ވިހެއީ ސެޕްޓެމްބަރު މަހުގެ 8 ގަ އެވެ.
ބޮލީވުޑްގެ މިހާރުގެ އެންމެ ނުފޫޒު ގަދަ ތަރިންގެ ތެރޭގައި ހިމެނޭ ދީޕިކާ އާއި ރަންވީރު ކައިވެނިކުރީ 2018 ގަ އެވެ.
އެ މީހުންގެ ދަރިފުޅުގެ ނަން އިއްޔެ އާންމުކުރި، ދެ ތަރިން މުހިއްމު ރޯލުތަކެއް ކުޅެފައިވާ ފިލްމު "ސިންގަމް އެގެއިން" އިއްޔެ ވަނީ ސިނަމާތަކަށް ގެނެސްފަ އެވެ. ޑައިރެކްޓަރު ރޯހިތު ޝެޓީގެ ކޮޕް ޔުނިވާސް އަށް ނިސްބަތްވާ އަޖޭ ދޭވްގަންގެ "ސިންގަމް" ފްރެންޗައިޒްގެ ތިން ވަނަ ބައިގައިި ދީޕިކާ އާއި ރަންވީރު ވެސް ކުޅެފައި ފުލުހުންގެ ރޯލެވެ.