ސްޓެލްކޯ އޮން ހުޅުމާލޭގެ ފޭސް ދޭއްހައި ބަހައްޓާފައި ކަރަންޓް ޓްރާންސްފޯމަރުން ވައްކަންކުރަން އުޅެނިކޮށް ހައްޔަރުކުރި މީހާގެ ބަންދަން އިތުރު 30 ދުވަސް ޖަހައިފި އެވެ.
އެ މައްސަލައިގައި މިދިޔަ މަހުގެ 27 ވަނަ ދުވަހު ހައްޔަރުކުރީ ނ. މާޅެންދޫ، ފެހިއައްސޭރި، އަހުމަދު ރިސްފާން، 23، އެވެ.
އޭނަ އަތުލައިގަތީ ހުޅުމާލޭ ފޭސް ދޭއްގެ ހިޔާ 13 ވަނަ ޓަވަރު ކައިރީގައި ހުރި ޓްރާންސްފޯމަރުގެ ތެރެއަށް ވަދެ ވައްކަން ކުރަން އުޅެނިކޮށެވެ.
ރިސްފާން ހައްޔަރުކޮށް އޭނަގެ ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރު ކުރުމުން ބަންދަށް ފުރަތަމަ ޖެހީ ފަސް ދުވަހެވެ. ފުލުހުން މިއަދު ބުނީ އޭނަގެ ބަންދަށް ކޯޓުން އިތުރު 30 ދުވަސް ޖެހީ އިއްޔެ ކަމަށެވެ.
މި އަހަރުގެ މާޗް މަހުގެ ތެރޭގައި ވެސް ހުޅުމާލޭގެ ޓްރާންސްފޯމަރަކުން ވައްކަން ކުރަން ވަދެ އުޅެނިކޮށް ކަރަންޓްގައި ޖެހިގެން ޒުވާނަކު މަރުވެފައިވެ އެވެ. އެއީ ހއ. ހޯރަފުށީ ފްރެންޒީ، ހުސެއިން ޝިފާއު، 27، އެވެ.