މިދިޔަ ހަފުތާގައި ބޭއްވި މޯލްޑިވްސް މީޑިއާ ކައުންސިލް (އެމްއެމްސީ )ގެ 11 ވަނަ ނޫސްވެރިކަމުގެ އެވޯޑު ހަފުލާގައި އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު ދީފައިވަނީ ކައުންސިލްގެ އެވޯޑް ދިނުމުގެ އުސޫލާއި މަގުސަދުތަކާ ހިލާފަށް ކަމަށް އެވޯޑްގެ ފަނޑިޔާރުން ބުނެފި އެވެ.
އެ ކެޓަގަރީން އެވޯޑް ލިބުނީ ރައީސް ޑރ. މުހައްމަދު މުއިއްޒުގެ ދޮންމަންމާފުޅު "ސްކީލާން" އަށް ބިނާކޮށް "އަދަދު" ނޫހުން އުފެއްދި ޑޮކިއުމެންޓަރީއަށެވެ.
ފަނޑިޔާރުން ނެރުނު ބަޔާނެއްގައި ބުނީ އެ އެވޯޑް ދީފައިވާ އުފެއްދުމަކީ ދިވެހި މީޑިއާގެ އަހުލާގީ މިންގަނޑުގައި ބަޔާންކޮށްފައިވާ އުސޫލުތަކަށް ބެލުމެއް ނެތި ޝާއިއުކޮށްފައިވާ ކޮންޓެންޓެއްކަން އެމްއެމްސީއަށް އެނގިފައި އޮތްވައި ކަމަށެވެ.
އެވޯޑުގެ ފަނޑިޔާރުންގެ ޕެނަލުގައި ހިމެނެނީ މުހައްމަދު ސަލީމް (ހޯރަފުށީ ސަލީމް)، ޝަމްއާން ޝާކިރު، ހަސަން އާމިރު، ފާތިމަތު އަޝްވާ ފަހީމް، އަބްދުﷲ ނައީމް އިބްރާހީމް އަދި އަބްދުﷲ އަޒްމީން އެވެ.
ބަޔާނުގައި ފަނޑިޔާރުން ބުނީ "ސްކީލާން" އެވޯޑަށް ބަަލައިގަނެ ނޮމިނޭޓްކޮށް ފަނޑިޔާރުންގެ ބެންޗަށް ހުށަހަޅާފައިވަ ނީ އެމްއެމްސީން ބަލަންވާ ވަރަށް ނުބަލައި ކަމަށެވެ. އެހެންވެ އެ އުފެއްދުން ކައުންސިލުން ބަލައިގަތް ނިޔަތާ މެދު ސުވާލު އުދެފޭ ކަމަށާއި އެކަމާ ގުޅިގެން ފަނޑިޔާރުން އެމްއެމްސީއާ ސުވާލުކޮށްފައިވާނެ ކަމަށް ވެސް ބަޔާނުގައި ބުންޏެވެ. އެކަމަކު އެމްއެމްސީން ޒިންމާދާރުކަމާއެކީ އެކަމަށް ޖަވާބުދާރީވެފައި ނުވާ ކަމަށް ބުންޏެވެ.
ބަޔާންގައި ފާހަގަކޮށްފައިވާ ގޮތުގައި އޯޑިއޯ ވީޑިއޯ ކެޓަގަރީ އަށް އިންސާފުކުރަން ފަނޑިޔާރުންނަށް ދީފައިވާ ރުބްރިކްގައި ތަހުގީގީ ނަޒަރަކުން އުފެއްދުމަށް އިންސާފުކުރެވޭނެ ގޮތް ވަރަށް ބޮޑަށް ހަނިކޮށްފައިވާ ކަމަށެވެ. އަދި ރުބްރިކްގައި 80 ޕަސެންޓް ފަރުމާކޮށްފައި އޮތީ ވީޑިއޯ އުފެއްދުމުގެ ޓެކްނިކަލް ކޮލިޓީސްތަކަށް މާކްސް ދޭންޖެހޭ ގޮތަށް ކަމަށާއި އެހެންވެ ތަހުގީގީ ނޫސްވެރިކަމުގެ ނަޒަރިއްޔާތަކުން މާކްސް ދެވޭނެ އެއްވެސް ގޮތެއް ނެތް ކަމަށް ފަނޑިޔާރުން ބުންޏެވެ.
އަދި ހުށަހަޅާފައިވާ ހުރިހާ އުފެއްދުންތައް އެވޯޑްގެ ޖުމްލަ ފަނޑިޔާރުންގެ ޕެނަލާ ހިއްސާކޮށްފައިނުވާ ކަމަށް ވެސް ބުނެފައިވެ އެވެ.
ބަޔާނުގައި ބުނީ ފަނޑިޔާރުންގެ ނިންމުންތައް މިނިވަން އޮޑިޓްފާމަކަށް ހުށަނާޅައި ހަވާލުކުރީ އެމްއެމްސީއަށް ކަމަށާއި ކުރިން ފަނޑިޔާރުންގެ ނިންމުންތައް ސިޓީ އުރައިގައި ބަންދުކޮށް މިނިވަން އޮޑިޓް ފާމަކާ ހަވާލުކުރާ ކަމަށެވެ. އެހެންވެ އިނާމު ދިނުމުގެ އުސޫލާ ހިލާފަށް ކަންކަން ގެންގޮސްފައިވާ ކަމަށް ބުންޏެވެ.
"ސްކީލާން" އަށް އުސޫލާ ހިލާފަށް އެވޯޑް ދިން އިރު، އެ އެވޯޑު ހަފުލާ އިންތިޒާމުކުރި ފަރާތުން ދައުލަތުގެ މީޑިއާ،މ ޕީއެސްއެމްގެ އެޑިޓޯރިއަލް ކޮންޓެންޓާއި ނޫސްވެރިކަމުގެ މިންގަނޑުތަކާ ހިލާފު ވީޑިއޯއެއް ދެއްކި މައްސަލައެއް ބަލައި ދިނުމަށް ޕީއެސްއެމުން މިހާރު އޮތީ ރައްޔިތުންގެ މަޖިލީހަށް ވެސް ހުށަހަޅައިފަ އެވެ.
މި މައްސަލަ ފެންމަތިވެ އެމްއެމްސީގެ ރައީސްގެ މަގާމުގައި ހުންނެވި އަހުމަދު މުސްތަފާ ޕީއެސްއެމްގައި އަދާކުރައްވަމުން ގެންދެވި ވަޒީފާއިން ވަކި ވެސް ކުރި އެވެ. އެކަމަކު އޭނަގެ ވަޒީފާ މިހާރު ވަނީ އަލުން އިޔާދަކޮށްފަ އެވެ.