ބައިސްކަލް ދުއްވަމުން މޮބައިލް ފޯނު ވާހަކަ ދައްކާ ނަމަ ޖަޕާނުގައި ބޮޑު އަދަބެއް ދޭން ކަނޑައަޅައި، އެކަން މިދިޔަ ހުކުރު ދުވަހުން ފެށިގެން ތަންފީޒު ކުރަން ފަށައިފި އެވެ.
އެއްގަމުގެ ދަތުރުފަތުރުގެ ގާނޫނަށް އަލަށް ގެނައި އިސްލާހަކާ އެކީ ބައިސްކަލް ދުއްވަމުން ފޯނުން ވާހަކަ ދައްކާ ނަމަ ގިނަވެގެން ހަ މަހުގެ ޖަލު ހުކުމެއް ނުވަތަ 100،000 ޔުއާން (655 ޑޮލަރު) އިން ޖޫރިމަނާކުރާނެ އެވެ. އަދި މަސްތުވެގެން އިނދެ ބައިސްކަލް ދުއްވައިފި ނަމަ ތިން އަހަރަށް ނުވަތަ 500،000 ޔުއާން (3،278 ޑޮލަރު) އިން ޖޫރިމަނާކުރާނެ އެވެ.
ފޯނު ވާހަކަ ދައްކަަމުން ދުއްވުމުގެ އިތުރުން މަސްތުވެގެން އިނދެ ދުއްވައިގެން އެކްސިޑެންޓެއްވެއްޖެ ނަމަ، އަހަރު ދުވަހުގެ ޖަލު ހުކުމެއް ނުވަތަ 300،000 ޔުއާއިން ޖޫރިމަނާ ކުރާނެ އެވެ.
ޖަޕާނުގެ ކަމާބެހޭ އިދާރާތަކުން ބުނީ 2021 އިން ފެށިގެން އެ ގައުމުގައި ބައިސްކަލް ދުއްވާ މީހުން ވަރަށް ބޮޑަށް އިތުރުވެފައިވާ ކަމަށާއި އެކަމާ ގުޅިގެން ހިނގާ އެކްސިޑެންޓްތައް ވެސް އިތުރުވެފައިވާ ކަމަށެވެ. ޕަބްލިކް ޓްރާންސްޕޯޓްގެ ބަދަލުގައި ގިނަ ބަޔަކު ބައިސްކަލް ބޭނުން ކުރަން ފެށީ ކޮވިޑްގެ ބަލިމަޑުކަމާ ވިދިގެންނެވެ.
ތަފާސްހިސާބުތައް ދައްކާ ގޮތުން މިދިޔަ އަހަރުގެ ތެރޭގައި ޖަޕާނުގައި ޖުމްލަކޮށް ހިނގި އެކްސިޑެންޓްތައް މަދު ނަމަވެސް، ބައިސްކަލް އެކްސިޑެންޓްތައް ދަނީ އިތުރުވަމުންނެވެ. އެގޮތުން މިދިޔަ އަހަރު އެކަނި ވެސް އެފަދަ 72،000 ހާދިސާއެއް ހިނގާފައިވެ އެވެ.
އެއްގަމުގެ ދަތުރުފަތުފުގެ ގާނޫނަށް އަލަށް ގެނައި އިސްލާހު ހުކުރު ދުވަހު ތަންފީޒު ކުރަން ފެށި އިރު، އޮސާކާގައި އިއްޔެ ގަވާއިދާ ހިލާފުވުމުގެ ފަސް ހާދިސާއެއް ރިޕޯޓްކޮށްފައިވާ ކަމަށް ވެސް މީޑިއާތަކުން ބުންޏެވެ. އޭގެ ތެރޭގައި މަސްތުވެގެން އިނދެ ދުއްވި މީހަކު އެކްސިޑެންޓްވި ހާދިސާއެއް ވެސް ހިމެނެ އެވެ.