މިއަދު ފާހަގަކުރަމިން އަންނަ ރާއްޖޭގެ ނަސްރުގެ ދުވަހާ ގުޅުވައިގެން އެ ދުވަހުގެ ހަނދާންތަކާ އެކު ސިފައިން ކުރިއަށް ގެންދާ މައުރަޒު ރައީސް ޑރ. މުޙައްމަދު މުޢިއްޒު ހުޅުވައިދެއްވައިފިއެވެ. އެމަނިކުފާނު
މައުރަޒު ހުޅުވައި ދެއްވީ އެކަމަށްޓަކައި ޚާއްޞަކޮށްގެންހެނދުނު ނެޝަނަލް އާޓް ގެލެރީގައި ބޭއްވި ރަސްމިއްޔާތެއްގަ އެވެ. އެ ރަސްމިއްޔާތުގައި ރައީސްގެ އަނބިކަނބަލުން މެޑަމް ސާޖިދާ މުޙައްމަދާއި ނައިބު ރައީސް ޙުސައިން މުޙައްމަދު ލަޠީފްގެ އިތުރުން ސިފައިންގެ އިސްވެރިންނާއި ވަޒީރުން އަދި ދަޢުލަތުގެ ބައެއް އިސްވެރިން ބައިވެރިވެވަޑައިގެންނެވި އެވެ.
މައުރަޒު 2024 ހުޅުވައިދެއްވުމަށް ފަހު ރައީސް ވަނީ މައުރަޒު ބައްލަވާލައްވައިފަ އެވެ.
މި މައުރަޒުން ފެނިގެން ދާނީ ނޮވެމްބަރު 3، 1988 ގައި ރާއްޖެއަށް ކުރިމަތިވި އުދުވާނީ ހަމަލާގައި ލިބުނު ގެއްލުންތަކާއި އެ ދުވަހު ނަޞްރު ހޯދުމަށް ސިފައިން ދެއްކި ހިތްވަރެވެ. މައުރަޒުގެ މައިގަނޑު އެއް ބޭނުމަކީ ނަޞްރުގެ ދުވަހުގެ މަޢުލޫމާތު އަދުގެ ޖީލަށް ބުނެދިނުމެވެ. މި މައުރަޒުން ގާތްގަނޑަކަށް 200 އަށްވުރެ ގިނަ ޑިސްޕްލޭ ފެންނަން ހުންނާނެއެވެ. އެހެން އަހަރުތަކާ ޚިލާފަށް މި އަހަރުގެ މައުރަޒުގައި ފޮޓޯގެ އިތުރުން ނަޞްރުގެ ދުވަހު ބޭނުންކުރި ބައެއް އަސްލު ހަތިޔާރާއި ބައެއް ތަކެތި އާންމުންނަށް ދައްކާލުމަށް ބަހައްޓާފައިވެ އެވެ.
ނަޞްރުގެ ދުވަހުގެ ސިފައިންގެ މައުރަޒު 2024 ކުރިއަށް ދާނީ ނޮވެންބަރު މިއަދުން ފެށިގެން މި މަހުގެ 9 އަށް އާޓް ގެލެރީގައެވެ. އަދި މި މައުރަޒު އާންމުންނަށް ބަލައިލުމަށް ހުޅުވާފައި ހުންނާނީ ހެނދުނު 9:00-12:00 އަށް، މެންދުރު ފަހު 2:00-6:00 އަށް އަދި ރޭގަނޑު 8:00-10:00 އަށެވެ.