ރާއްޖޭގެ އެންމެ ބޮޑު މިސްކިތް ކަމަށްވާ މާލޭގެ އިސްލާމީ މަރުކަޒަށް 40 އަހަރު ފުރުން ފާހަގަކުރަން ތައްޔާރީތައްވާން ފަށައިފި އެވެ.
އެ މިސްކިތް ހުޅުވީ ނޮވެމްބަރު 11، 1984 އެވެ.
އިސްލާމީ މަރުކަޒުގެ 40 ވަނަ އަހަރީ ދުވަސް ފާހަގަކުރުމުގެ ތައްޔާރީތަކުގެ ތެރެއިން މިސްކިތް ސާފުކޮށް ނަލަކުރުމުގެ ގިނަ މަސައްކަތްތަކެއް އިސްލާމިކް މިނިސްޓްރީގެ މުވައްޒަފުން މިހާރު އަންނަނީ ވަރަށް ބުރަކޮށް ކުރަމުންނެވެ. އަދި މިސްކިތުގެ ބަގީޗާ ރީތި ކުރަން މުވައްޒަފުން ހޯދާ ގަސްތަކުން މިސްކިތުގެ ގޯތިތެރެ ޒިނަތްތެރި ކުރުމުގެ މަސައްކަތް ވެސް އަންނަނީ ކުރަމުންނެވެ.
އިސްލާމީ މަރުކަޒުގެ 40 ވަނަ އަހަރީ ދުވަސް ފާހަގަކުރުމާ ދިމާކޮށް މިސްކިތުގެ މުންނާރުގެ ވަށައިގެން މަސްގަނޑެއް ހަދައި ދިއްލުމުގެ މަސައްކަތް ވެސް މިހާރު އަންނަނީ ކުރަމުންނެވެ. ކުރިން އެ މަސައްކަތް ކުރަން ނިންމީ މިނިސްޓްރީގެ ބަޖެޓުން ނަމަވެސް، ބަޖެޓްގެ ތާށިކަމާ ހުރެ އެ މަސައްކަތް މިނިސްޓްރީން ކުރިއަށް ނުގެންދަން ނިންމި އެވެ.
އެކަމަކު މަސައްކަތް ކުރިއަށް ދަނީ ސްޓެލްކޯގެ އިޖުތިމާއީ ޒިންމާގެ ދަށުންނެވެ.