ދުނިޔޭގެ އެންމެ ބޮޑު ކިނބޫ 110 އަހަރުގައި މަރުވެއްޖެ އެވެ.
ކެސިއަސްގެ ނަން ދީފައިވާ 18 ފޫޓްގެ ކިނބޫ މަރުވީ އެ އޮތް އޮސްޓްރޭލިއާގެ މެރީންލޭންޑް މެލެނީޝިއާ ކްރޮކޮޑައިލް ހެބިޓެޓްގަ އެވެ. ކެސިއަސް މަރުވި ވާހަކަ އެތަނުގެ ސޯޝަލް މީޑިއާގައި ހިއްސާކޮށްފައި ވަނީ އިއްޔެ އެވެ.
މެރީންލޭންޑް މެލެނީޝިއާ ކްރޮކޮޑައިލް ހެބިޓެޓަށް ކެސިއަސް ގެންދިޔައީ 1987 ގަ އެވެ. އެއީ އެތަނުގެ ވެރިޔާ ޖޯޖް ކްރެއިގް އެ ގަނެގެނެވެ. ކެސިއަސް ހިފާފައި ވަނީ 1980 ގެ ތެރޭގައި އޮސްޓްރޭލިއާގެ އުތުރުގެ ސަރަހައްދުންނެވެ.
މަރުވި އިރު، އޭގެ އުމުރަކީ 110 އަހަރު ކަމަށް ބެލެވުނަސް އެކަން ރަސްމީކޮށް ކަށަވަރު ކުރެވިފައި ނުވާ ކަމަށް މީޑިއާތަކުން ބުންޏެވެ.
ދުނިޔޭގެ އެންމެ ބޮޑު ކިނބޫގެ ގޮތުގައި ގިނިސް ވޯލްޑް ރެކޯޑަށް ކެސިއަސް އެރީ 2011 ގަ އެވެ.