ރައީސް ޑރ. މުޙައްމަދު މުޢިއްޒުގެ އަމާޒަކީ ރާއްޖޭގެ އިސްލާމީ ޔުނިވާސިޓީއަކީ ބޭރުގެ ދަރިވަރުން ބޭރުން ވެސް ތައުލީމު ހާސިލުި ކުރަން އަންނަ ހެދުން ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެ އެވެ.
އެ ޔުނިވާސިޓީގެ ކުއްލިއްޔާ އޮފް ޤުރްއާން އެންޑް ސުންނާގެ ފަރާތުން އިންތިޒާމުކޮށްގެން ބާއްވާ "މަޙްފަލުލް ޤުރްއާނިލް ކަރީމް 1446" ގެ ފެށުމުގެ ރަސްމިއްޔާތުގައި މިނިސްޓަރު ވިދާޅުވީ، އަންނަ އަހަރަކީ އައިޔޫއެމަށް ވަރަށް ފާގަތި އަހަރަކަށް ވާނެ ކަމަށެވެ.
އެގޮތުން ރައީސްގެ މެނިފެސްޓޯގައި އެ ޔުނިވާސިޓީއާ ގުޅޭ ވަރަށް ރަނގަޅު ތަޞައްވުރެއް އެކުލަވާލެވިފައިވާތީ އެމި ތަޞައްވަރު ޙަޤީޤަތަކަށް ހެއްދެވުމަށްޓަކައި ރައީސް މަސައްކަތް ކުރައްވަމުން ގެންދަވާ ކަމަށާއި އަންނަ އަހަރު އެކަމުގައި ޢަމަލީ ސިފަތައް ޖެހޭ ތަން ފެންނާނެ ކަމަށް ޝަހީމު ވިދާޅުވި އެވެ.
ކުރިން އައިޔޫއެމްގެ ޗާންސެލަރުގެ މަގާމު ވެސް ފުރުއްވި ޝަހީމު ވިދާޅުވީ އިސްލާމީ ޢިލްމު ފެތުރެއްވުމަށް އިސްލާމީ ޔުނިވާސިޓީން ކުރަމުން އަންނަ މަސައްކަތްތަކަށް މިނިސްޓްރީގެ ފަރާތުން ދޭން ޖެހޭ ފުރިހަމަަ އެއްބާރުލުމާއި އެހީތެރިކަން އަބަދު ވެސް ލިބޭނެ ކަމަށެވެ.