ހުކުރު ދުވަހު ސިނަމާތަށް ގެނައި "ސިންގަމް އެގެއިން" ކުޅުނު ނެގަޓިވް ރޯލަށް ލިބެމުން އަންނަ ތަރުހީބާ ގުޅިގެން، އެކްޓަރެއްގެ ގޮތުގައި އިތުރު ހިތްވަރެއް ލިބިފައިވާ ކަމަށް އަރުޖުން ކަޕޫރް ބުނެފި އެވެ.
ޑައިރެކްޓަރު ރޯހިތު ޝެޓީގެ ކޮޕް ޔުނިވާސްގައި ހިމެނޭ އަޖޭ ދޭވްގަންގެ "ސިންގަމް" ފްރެންޗައިޒްގެ ތިން ވަނަ ބައިގައި ކުޅުނު ޑަންކާރް ލަންކާ/ޒުބައިރު ހަފީޒު ކިޔާ ވިލަންގެ ކެރެކްޓާއާ ގުޅޭ ގޮތުން ބައެއް ކްރިޓިކުން ފާޅުކޮށްފައިވާ ޝުއޫރުތަކަކާ އެކީ އަރުޖުން ސޯޝަލް މީޑިއާ ޕޯސްޓެއްގައި ބުނީ އޭނަގެ ކެރެކްޓާ އަށް ދެމުން އަންނަ ސަޕޯޓަށްޓަކައި ޝުކުރު އަދާކުރާ ކަމަށެވެ.
އޭނަ ބުނީ މީގެ 15 މަސް ކުރިން "ސިންގަމް އެގެއިން" ފުރުސަތު ލިބުމާ އެކީ އެ ފިލްމަށް ހުސްވި ކަމަށާއި އެންމެ ބޭނުންވީ ރޯހިތާއި ފޭނުން ވެސް މާޔޫސްވިޔަ ނުދޭ ވަރުގެ މަސައްކަތެއް ފިލްމަށް ކުރުން ކަމަށެވެ.
އެހެންވެ އެކަން "ސިންގަމް އެގެއިން" އަށް ސިނަމާތަކުގައި ލިބެމުން އަންނަ ތަރުހީބުން ސާބިތުކޮށް ދެވިއްޖެ ކަމަށް ގަބޫލުކުރާ ކަމަށް އަރުޖުން ބުންޏެވެ. އޭނާ ބުނީ މި ފިލްމުގައި ކުޅުނު ވަރުގަދަ ކެެރެކްޓާއާ އެކު، 2012 ގެ "އިޝަގްޒާދޭ" އިން ބޮލީވުޑަށް ނުކުތް ފިރިހެން ކުއްޖާ މިހާރު ބޮޑު ފިރިހެނަކަށް ވެސް ވެއްޖެ ކަމަށެވެ.
"އެހެންވެ ސިންގަމް އެގެއިން އިން ލިބެމުން އަންނަ ލޯތްބާއި ސަޕޯޓުން ހިތްވަރު އިތުރަށް އާލާވެއްޖެ." އަރުޖުން ބުންޏެވެ.
މި ފިލްމުގެ ކާސްޓްގައި އަޖޭއާ އަކީ ކަރީނާ ކަޕޫރް، ޓައިގާ ޝްރޮޮފް، ދީޕިކާ ޕަދްކޯންގެ އިތުރުން ރަންވީރު ސިންގް އާއި އަކްޝޭ ކުމާރު ވެސް ހިމެނެ އެވެ.