ދުނިޔޭގެ އެންމެ ބޮޑު އެއް ޓޫރިޒަމް ފެއާ، ވޯލްޑް ޓްރެވަލް މާކެޓް (ޑަބްލިއުޓީއެމް)ގައި އައްޑޫ ސިޓީ އިޝްތިހާރު ކުރަން ނިންމައިފި އެވެ.
އިނގިރޭސިވިލާތުގެ ވެރިރަށް ލަންޑަނުގައި މި ފެއާ ކުރިއަށް ދާނީ މި މަހުގެ 5 އިން 7 ގެ ނިޔަލަށެވެ.
މި ފެއާގައި ރާއްޖެ ޕްރޮމޯޓްކުރުމުގައި އިސްކޮށް ހަރަކާތްތެރިވަނީ ރާއްޖޭގެ ޓޫރިޒަމް ޕްރޮމޯޓްކުރަން ސަރުކާރުން އުފައްދާފައިވާ މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ)ން އެވެ.
ފެއާގައި ރާއްޖޭގެ ރީތިކަން ދައްކާލަން ހާއްސަކޮށްފައިވާ ސްޓޭންޑް މެދުވެރިކޮށް، އައްޑޫގެ ރީތި ކަމާއި އަދި އައްޑޫއާ ގުޅޭ ތަފާތު އެކި މައުލޫމާތުތައް ފޯރުކޮށްދިނުމަށް ވަނީ ހަމަޖެހިފަ އެވެ.
ޑަބްލިއުޓީއެމްގައި އައްޑޫ އިޝްތިހާރު ކުރަން ނިންމާފައިވާއިރު، އައްޑޫ ވަކި މަންޒިލެއްގެ ގޮތުގައި ޕްރޮމޯޓްކުރަން ހެދި ބްރޭންޑް ކަމަށްވާ "އައްޑޫ؛ ބިޔޯންޑް ދި އީކްއޭޓާ" ދާދިފަހުން ވަނީ ލޯންޗުކޮށްފަ އެވެ.
އައްޑޫގައި މި ވަގުތު ތިން ރިސޯޓެއް އޮޕަރޭޓް ކުރެ އެވެ. އެއީ ކެނަރީފާއި ސައުތު ޕާމް ރިސޯޓާއި ގަމުގެ އީކްއޭޓަ ވިޖެވެ. އައްޑޫގެ ރިސޯޓްތަކުގެ ތެރެއިން ޝަންގްރިއްލާ ވިލިގިލި ރިސޯޓް އެންޑް ސްޕާ ބަންދުކޮށްފައި އޮންނަތާ ހަތަރު އަހަރެއްހާ ދުވަސްވެފައިވާ އިރު، މި އަހަރުގެ ޑިސެމްބަރުގައި އެތަން އަލުން ހުޅުވޭތޯ މަސައްކަތް ކުރަމުން އަންނަ ކަމަށް ސަރުކާރުން ބުނެފައިވެ އެވެ.
އައްޑު އަކީ ގެސްޓް ހައުސްގެ ވިޔަފާރި ވެސް ހިންގަމުން އަންނަ ތަނެކެވެ.