ދުނިޔޭގެ ސިއްހަތު ޖަމިއްޔާ އިން ގާޒާގައި ފަށާފައި އޮތް ޕޯލިއޯ ވެކްސިން ކެމްޕޭނަށް ބޭނުން ކުރަމުން އައި ކްލިނިކަކަށް ހޮނިހިރު ދިން ހަމަލާ އަށް ފަހު، އެ ކެމްޕޭން މިއަދު އަލުން ފަށައިފި އެވެ.
އިރުމަތީ ގާޒާގެ ޝެއިހް ރަދުވާން ކްލިނިކަަށް ހޮނިހިރު ދުވަހު ދިން ހަމަލާގައި ހަ މީހަކާއި ހަތަރު ކުދިން ޒަހަމްވެފައިވެ އެވެ. އެ ހަމަލާ އަށް ފަހު އަލުން ޕޯލިއޯ ވެކްސިން ދިނުމުގެ މަސައްކަތް ފެށި ނަމަވެސް، ހަމަލާދިން ބަޔަކާ ބެހޭ އެއްވެސް މައުލޫމާތެއް ޑަބްލިއުއެޗްއޯ އިން ހާމައެއް ނުކުރެ އެވެ.
ނަމަވެސް ގާޒާގެ ސިވިލް ޑިފެންސް ފޯސް އިން ބުނީ ޕޯލިއޯ ވެކްސިން ކްލިނިކަަށް ހަމަލާ ދިނީ އިޒްރޭލުގެ ވައިގެ އުޅަނދަކުން ކަމަށެވެ.
ޔުނިސެފް މެދުވެރިކޮށް ގާޒާގައި ޕޯލިއޯ ވެކްސިން ދިނުމުގެ ޕްރޮގްރާމެއް ފެށީ 25 އަހަރު ފަހުން އެ ބަލީގެ ކޭހެއް މިދިޔަ އޮގަސްޓް މަހުގެ ތެރޭގައި ގާޒާ އިން ފެނުމާ ގުޅިގެންނެވެ. އިޒްރޭލުން މިދިޔަ އަހަރުގެ އޮކްޓޯބަރު މަހުގެ 7 އިން ފެށިގެން ފަލަސްތީނަށް ދެމުންދާ ހަމަލާތަކުގެ ސަބަބުން އިންސާނީ ބޮޑު ކާރިސާއެއްގެ ތެރޭގައި އޮތް ގާޒާގައި ޕޯލިއޯ ބަލި ވަރަށް ބޮޑަށް ފެތުރިދާނެކަމުގެ ބިރާ އެކު ޑެބްލިއުއެޗްއޯ އިން ވެކްސިން ޕްރޮގްރާމް ފެށީ ސެޕްޓެމްބަރު މަހުގެ 1 ގަ އެވެ.
މި ޕޯލިއޯ ވެކްސިންގެ ފުރަތަމަ ފޭހުގައި މަދުވެގެން 640،000 ކުދިންނަށް ވެކްސިން ދޭން އަމާޒު ހިފާފައިވާ އިރު، މިހާތަނަށް 559،000 ކުދިންނަށް ވެކްސިން ދީފައިވެ އެވެ. ނަމަވެސް އުތުރު ގާޒާގެ ސަރަހައްދުތައް ކަމަށްވާ ޖަބަލިއާ އާއި ބެއިތު ލަހިއާގެ ބެއިތު ހަނޫން ފަދަ ސަރަހައްދުތަކުގެ ހާލަތު އޮތް ގޮތުން 15،000 އެއްހާ ކުދިންނަށް ވެކްސިން ކެމްޕޭނުން މަހުރޫމުވެފައިވެ އެވެ.