ބިދޭސީންނާ ބެހޭ މައުލޫމާތު އެއްކުރަން ފަށާފައި އޮތް "ކުރަނގި" އޮޕަރޭޝަން މާދަމާ ފުވައްމުލަކުހައި ފަށަން ނިންމައިފި އެވެ.
އެގޮތުން އެ ސިޓީގައި އުޅޭ ބިދޭސީންގެ ބައޯމެޓްރިކް ޑޭޓާ ނެގުމުގެ މަސައްކަތް ކުރިއަށް ގެންދަން ހަމަޖެހިފައި ވަނީ މާދަމާ އިން ފެށިގެން މި މަހުގެ 20 އާ ހަމައަށެވެ. މި މަސައްކަތް ކުރިއަށް ގެންދާނީ ފުވައްމުލަކު ސިޓީ ކައުންސިލާ ގުޅިގެންނެވެ.
"ކުރަނގި" އޮޕަރޭޝަން އެ ސިޓީގައި ކުރިއަށް ގެންދިއުމާ ގުޅޭ ގޮތުން ހޯމްލޭންޑް މިނިސްޓްރީ އާއި އިމިގްރޭޝަނާއި ފުލުހުންނާއި ލޭބާ ރިލޭޝަން އޮތޯރޮޓީން ސެޕްޓެމްބަރު މަހުގެ ތެރޭގައި ފުވައްމުލަކު ކައުންސިކާ އެކީ މަޝްވަރާ ބައްދަލުވުމެއް ވެސް ބާއްވާފައިވެ އެވެ.
ފުވައްމުލަކުގައި "ކުރަނގި" އޮޕަރޭޝަން ފަށާތީ ބިދޭސީ މަސައްކަތްތެރިން ގެންގުޅޭ ފަރާތްތަކުން މިކަމުގައި ފުރިހަމަ އެއްބާރުލުން ދިނުމަށް ކައުންސިލުން އެދިފައިވެ އެވެ.
މި އަހަރުގެ ޖޫން މަހުގެ 3 ވަނަ ދުވަހު ފެށި މި އޮޕަރޭޝަން މިހާތަނަށް ރާއްޖޭގެ އެކި ހިސާބުތަކުން 8،385 ބިދޭސީއެއްގެ މައުލޫމާތި ނަގާފައިވެ އެވެ. އެގޮތުން މިހާތަނަށް 96 ރަށެއްގައި މި މަސައްކަތް ފަށައި 21 ރަށެއްގައި މަސައްކަތް ނިންމާފައިވާ ކަމަށް ހޯމްލޭންޑް މިނިސްޓްރީން ބުނެފައިވެ އެވެ.
"ކުރަނގ" އޮޕަރޭޝަންގެ ގެ މައިގަނޑު މަގުސަދަކީ ރާއްޖޭގައި ގަވާއިދާ ޚިލާފަށް ދިރިއުޅެމުންދާ ބިދޭސީންގެ މައްސަލަ އަށް ދާއިމީ ހައްލެއް ހޯދުމެވެ. ތިން އަހަރުގެ ތެރޭގައި މި މައްސަލަ ހައްލު ކުރުމަކީ ސަރުކާރުގެ ވަރަށް ބޮޑު އަމާޒެކެވެ.