އަންނަ އަހަރު ބާއްވަން ހަމަޖެހިފައިވާ ދިވެހީންގެ އުފެއްދުންތެރިކަމުގެ މައުރަޒު 2025 (މޯލްޑިވްސް އެކްސްޕޯ) އާ ގުޅޭ މައުލޫމާތު ދިނުމުގެ ބައްދަލުވުމެއް ބާއްވައިފިއެވެ.
އޮންލައިންކޮށް އެ ބައްދަލުވުން ބޭއްވީ ބިޒްނެސް ސެންޓަ ކޯޕަރޭޝަން (ބީސީސީ) އިން ރާއްޖޭގެ އެކި ހިސާބުތަކުގައި ގާއިމުކޮށްފައިވާ 13 ރީޖަނަލް ސެންޓަރުގެ އޮފިޝަލުންނަށެވެ. އެ މައުލޫމާތުި ސެޝަނުގައި ބިޒްނަސް ސެންޓަރުގެ މެނޭޖަރުންނާއި އޮފިޝަލުންނަށް ކުރިއަށް އުފެއްދުންތެރިކަމުގެ މައުރަޒުގައި ވާދަކުރުމުގެ ބައިގައި ބައިވެރިވުމުގައި އަމަލު ކުރަން ޖެހޭ ގޮތުގެ މަޢުލޫމާތު ޙިއްޞާކޮށްފައިވެ އެވެ.
މީގެ އިތުރުން މަޢުރަޒައި ބައިވެރިވެވޭނެ ދާއިރާތަކާއި، ތަކެތިބައިވެރި ކުރެވޭނެ ގިންތިތަކާއި އިންސާފު ކުރުމުގައި ބަލާނެ ކަންކަމުގެ މުހިންމު މަޢުލޫމާތުތަކެއް ހިއްސާކުރި އެވެ. ބިޒްނަސް ސެންޓަރުގެ އޮފިޝަލުންގެ އައުޓްރީޗް ޕްރޮގްރާމުތަކުގައި ރާއްޖޭގެ އުފެއްދުންތެރިންނަށް މައުރަޒުގައި ވާދަކުރުމަށް ތަކެތިބައިވެރި ކުރުމުގެ މަޢުލޫމާތު ފޯރުކޮށް ދިނުމަށް ވެސް ހަމަޖެހިފައިވެ އެވެ.
ރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާކުރުމުގެ މަގުސަދުގައި ވިޔަފާރި އާއި އުފެއްދުންތެރި ކަމަށް އަމާޒުކޮށް ބާއްވާ މައުރަޒު އޮންނާނީ އަންނަ އަހަރުގެ މެއި 23-31 އަށެވެ. އޭގައި ބައިވެރިވާން ވެސް މިހާރު އޮތީ ހުޅުވާލައިފަ އެވެ.