ސިޔާސީ ޕާޓީގެ ޤާނޫނަށް ސަރުކާރުގެ ފަރާތުން ހުށަހަޅާފައިވާ އިސްލާހުގެ ބަހުސް ފަށައިފި އެވެ.
ސިޔާސީ ޕާޓީގެ ޤާނޫނަށް ސަރުކާރުގެ ފަރާތުން އިސްލާހު ހުށަހަޅުއްވާފައިވަނީ ދިއްދޫ ދާއިރާގެ މެންބަރު އަބްދުއްލަތީފް މުހައްމަދު އެވެ.
މި އިސްލާހުގައި ވަނީ، ސިޔާސީ ޕާޓީގެ ޤާނޫނުގެ 10 ވަނަ މާއްްދާ އުވާލުމަށެވެ. އަދި ބަޖެޓުން އެ އަހަރަށް ލަފާކުރާ އާމްދަނީގެ 0.1% އާއި 0.2% އާ ދެމެދުގެ އަދަދެއް ދައުލަތުގެ ބަޖެޓުން ޕާޓީތަކަށް ދިނުމަށް އިސްލާހު ހުށަހަޅާފައިވެ އެވެ.
މީގެއިތުރުން ސިޔާސީ ޕާޓީގެ ޤާނޫނާ ހިލާފުވާ ފަރާތެއް 30،000 ރުފިޔާއާއި 75،000 ރުފިޔާއާ ދެމެދުގެ އަދަދަކުން ޖުރިމަނާ ކުރެވޭނެ ކަމަށެވެ. އަދި އެ އަމަލެއް ހިންގި ފަރާތެއް ނިސްބަތްވާ ޕާޓީއެއް 100،000 ރުފިޔާއިން ޖުރިމަނާ ކުރެވޭނެ ކަމަށްވެސް ބުނެފައިވެ އެވެ.
މި އިސްލާހު މަޖިލީހަށް ހުށަހަޅުއްވާ ވާހަކަ ދައްކަވަމުން މެންބަރު ލަތީފް ވިދާޅުވީ ޕާޓީތަކުގެ ތެރޭގައި މިހާރު ކަންކަން ކުރެވެނީ އެބަޔަކު ބޭނުންވާގޮތަކަށް ކަމަށެވެ. މި އިސްލާހުގެ ސަބަބުން ބާރުހުރި މީހާ ބޭނުންވާގޮތަކަށް، ޖަލުގައި ހުރެގެން ޕާޓީތައް ނުހިންގޭނެ ކަމަށް ލަތީފް ވިދާޅުވި އެވެ. އަދި މި ބިލަކީ ސިޔާސީ ނިޒާމު ހަރުދަނާވެ ހުދުމުހުތާރު ވެރިންގެ އަތްމަތިން ޕާޓީތައް ސަލާމަތްވާނެ އިސްލާހެއް ކަމަށް ވިދާޅުވި އެވެ.