އައިޑީ ކާޑު، ޕްރިންޓް ކުރުމުގެ ޚިދުމަތް ދ. ކުޑަހުވަދޫގައި ފަށަން ތައްޔާރުވެއްޖެ އެވެ.
މިއީ އެ ހިދުމަތް ފަށާ ދެވަނަ ރަށެވެ.
ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރް) އިން ބުނީ އައިޑީ ކާޑު، ޕްރިންޓްކޮށް ދޫކުރުމުގެ ޚިދުމަތް ކުޑަހުވަދޫގައި މާދަމާގެ ފަށާނެ ކަމަށާއި އެ ޚިދުމަތް ދޭނީ ދ. އަތޮޅު ކައުންސިލްގެ އެހީތެރިކަމާ އެކީގައި ކަމަށެވެ.
ކުޑަހުވަދޫގައި އައިޑީ ކާޑުގެ ހިދުމަތް ފައްޓަވައި ދެއްވާނީ ހޯމްލޭންޑް މިނިސްޓަރު އަލީ އިހުސާނެވެ.
ރާއްޖޭގެ މީހުން ދިރިއުޅޭ ކޮންމެ އަތޮޅަކުން ނުވަތަ އަތޮޅުވެރިކަން ކުރާ ރަށަކުން އައިޑީ ކާޑުގެ ޚިދުމަތް ފޯރުކޮށް ދިނުމަކީ ރައީސް ޑރ. މުހައްމަދު މުޢިއްޒުގެ ވައުދެކެވެ. އެ ވައުދުގެ ދަށުން އެ ހިދުމަތް މާލެ އިން ބޭރުން ދޭން ފެށި ފުރަތަމަ ރަށަކީ ގއ. ވިލިގިއްޔެވެ. އެ ރަށުގައި އެ ހިދުމަތް ތައާރަފުކުރީ ސެޕްޓެމްބަރު 19 ގަ އެވެ.
ރާއްޖޭގައި ދިރިއުޅޭ ރައްޔިތުންގެ މަޢުލޫމާތު އެއްކޮށް އެއްތަނަކުން ބެލެހެއްޓުމުގެ މަސައްކަތް 1984 ގައި ފެށީ އައިޑެންޓިޓީ ކާޑު ޔުނިޓުންނެވެ. އޭގެ ފަހުން އެތަން ޑީއެންއާރް އަށް އަށް ބަދަލުކުރީ ނޮވެމްބަރު 11، 1993 ގަ އެވެ.
ޑީއެންއާރުގެ 174 ކަލެކްޓިން ސެންޓަރު ގާއިމު ކޮށްފައިވާ އިރު ފުރަތަމަ ފަހަރަށް އޮންލައިންކޮށް އައިޑީ ކާޑު ހެދުމުގެ މަަސައްކަތް ފެށީ ކޮވިޑާ ގުޅިގެން 2021 ގަ އެވެ. އޭގެ ކުރިން ބޭނުން ކުރަމުން އައި އޮންލައިން ޕޯޓަލްގެ ބަދަލުގައި ޑީއެންއާރު އޮންލައިން ޕޯޓަލްއެއް ޤާއިމުކޮށް އަމިއްލަ އަށް ކާޑަށް ހުށަހެޅޭ ގޮތް ހަމަޖެއްސީ މިދިޔަ އަހަރުގެ މާޗް މަހުގެ ތެރޭގަ އެވެ. އަދި ކާޑު ޕްރިންޓުކުރުމަށް ފަހު، ޑީއެންއާރުން އެ މީހަކު ހުރި ރަށެއްގެ ކައުންސިލަށް ކާޑު ފޮނުވޭނެ ޚިދުމަތް ތަޢާރަފުކޮށްފައިވެ އެވެ.
.