ބޮލީވުޑްގެ އެކްޓަރު ވަރޫން ދަވަން ވަރުގަދަ އެކްޝަން ރޯލެއް ކުޅެފައިވާ ފިލްމު "ބޭބީ ޖޯން" ޓީޒާ ޓްރެއިލާ މިއަދު ދައްކާލައިފި އެވެ.
އަންނަ މަހުގެ 25 ގައި ސިނަމާތަކަށް ގެންނަން ހަމަޖެހިފައިވާ މި ފިލްމަކީ މިދިޔަ އަހަރު ރިލީޒްކުރި ޝާހްރުކް ޚާންގެ "ޖަވާން" ގެ ޑައިރެކްޓަރު އެޓްލީ، ޑައިރެކްޓްކޮށް 2016 ގައި ގެނެސްދިން ކާމިޔާބު ތަމަޅަ އެކްޝަން ތުރިލާ "ތެރީ" ގެ ރިމެކޭކެވެ. އެޓްލީ އާއި ޕްރޮޑިއުސަރު މުދާރު ކެތާނީ ޕްރޮޑިއުސްކޮށްފައިވާ "ބޭބީ ޖޯން" ގެ ޑައިރެކްޓަރަކީ ކުޅަދާނަ ތަމަޅަ ޑައިރެކްޓަރު ކާލީސް އެވެ.
މި ފިލްމުގެ ބަތަލާއިންނަކީ ނެޝަނަލް އެވޯޑް ހޯދާފައިވާ ދެކުނުގެ ބަތަލާ ކީރްތީ ސުރޭޝް އާއި ވަމީގާ ގައްބީ އެވެ. "ބޭބީ ޖޯން" ގެ ވިލަން އަކީ ޖެކީ ޝްރޮފް އެވެ. ފލްމުގެ އިތުރު ކާސްޓުންގެ ތެރޭގައި ރާޖްޕަލް ޔާދަވް، ޒާކިރު ހުސައިން، ޝީބާ ޗައްޑާ ހިމެނެ އެވެ.
މީގެ އިތުރުން ފިލްމުގެ ހާއްސަ ފެނިލުންތަކުގައި ސަލްމާން ޚާނާއި ސާނިއާ މަލްއުތުރާ ވެސް ހިމެނެ އެވެ.
"ބޭބީ ޖޯން" އަންނަ މަހު ބެލުންތެރިންނަށް ގެނެސްދޭން ތައްޔާރުވަމުން އަންނަ އިރު، ވަރޫންގެ ފުރަތަމަ ވެބް ސީރީޒް "ސިޓަޑެލް: ހަނީ ބަނީ" މި މަހުގެ 7 ގައި އެމެޒޯން ޕްރައިމް ވީޑިއޯ އިން ޕްރީމިއާކުރާނެ އެވެ.