އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ބަޖެޓާ ގުޅޭ ތަފުސީލުތައް އާންމުންނަށް ސާފުކޮށް ކިޔައި ދޭން ވެރިކަން ކުރާ ޕާޓީ، ޕީއެންސީން ސިލްސިލާ ފޯރަމްތަކެއް ބާއްވަން ނިންމައިފި އެވެ.
"ރައްޔިތުންގެ ސައްލާ ފޯރަމް" ގެ ނަމުގައި މި ފޯރަމް ފަށަން ހަމަޖެހިފައި ވަނީ މި ރެ އެވެ. އެގޮތުން ޕީއެންސީގެ ހަރުގޭގައި ބާއްވާ ފެނަލް ޑިޝްކަޝަންގެ މައުޟޫއަކީ މި" ގެދޮރުވެރިކަމުގެ ބަޖެޓު 2025" އެވެ.
މިރޭގެ ފޯރަމްގެ ޕެނެލްގެ ބައިވެރިންނަކީ ޕީއެންސީގެ ނައިބު ރައީސް ބާރަށު ދާއިރާގެ މެމްބަރު އިބްރާހީމް ޝުޖާ އާއި ރައީސް އޮފީހުގެ އަންޑަ-ސެކްރެޓަރީ ފޯ ލީގަލް އެފެއާޒް މުހައްމަދު ފިރުޒުލްގެ އިތުރުން ފިނޭންސް މިނިސްޓްރީގެ ނައިބު އަހުމަދު ސާއިދު މުސްތަފާ އެވެ.
ފޯރަމްގައި ބައިވެރިވެ އާންމުންނަށް ސުވާލުކުރުމުގެ ފުރުސަތު އޮންނާނެ އެވެ.
އަންނަ އަހަރަށް ލަފާކޮށް ހުށަހަޅާފައި ވަނީ 56.6 ބިލިއަން ރުފިޔާގެ ބަޖެޓެކެވެ. މި ބަޖެޓްގައި ބޯހިޔާވެހި ކަމަށް ވަރަށް ބޮޑު އިސްކަމެއް ދީފައިވާތީ ބަޖެޓަށް ސަރުކާރުން ކިޔަނީ ގެދޮރުވެރިކަމުގެ ބަޖެޓް އެވެ.