ރާއްޖޭގައި ދީނީ ރޫޙް އަށަގަނެ، ޤުރުއާން ކިޔެވުމުގެ ޝައުޤުވެރިކަން އުފެދިގެން ދިޔައީ ކުރީގެ ރައީސް މައުމޫން ޢަބްދުލް ޤައްޔޫމް ކުރެއްވި މިންނަތް މަސައްކަތްތަކުން ކަމަށް އިދާރީ ދާއިރާތަކާ ބެހޭ މިނިސްޓަރު އާދަމް ޝަރީފު ޢުމަރު ވިދާޅުވެއްޖެ
އެވެ.
ހދ. ހަނިމާދޫގައި ބޭއްވި "ތިލަދެކުނު ޤުރުއާން މުބާރާތް 2024" ނިންމުމުގެ ރަސްމިއްޔާތު ޝަރަފުވެރިކޮށް ދެއްވައި މިނިސްޓަރު ވިދާޅުވީ ރައީސް މަައުމޫންގެ ވެރިކަމުގެ ކުރިން ރާއްޖޭގައި ޤުރުއާން ކިޔަވަން ނޭނގޭ ބަޔަކު އުޅުނު ކަމަށެވެ.
"ރާއްޖޭގައި އަޅުގަނޑުމެން ހަނދާން އެބަހުރި މީގެ ސާޅީހަކަށް އަހަރުކުރިން ރީއްޗަށް ޤުރުއާން ކިޔަވަން ކީއްކުރަންތޯ؟ ހަމައެއްގޮތަކަށް ވެސް ޤުރުއާން ކިޔަވަން ނޭނގޭ ގިނަ ބަޔަކު ރާއްޖޭގައި ދިރިއުޅެމުން އައި." އާދަމް ޝަރީފު ވިދާޅުވި އެވެ.
އޭނަ ވިދާޅުވީ ދިވެހިންގެ ތެރޭގައި ދީނީ ރޫޙު އަށަގަނެ، ޤުރުއާން ކިޔެވުމުގެ ޝައުޤުވެރިކަން އުފެދިގެން ދިޔައީ މައުމޫނުގެ ޒަޢާމަތުގައި، ފެއްޓެވި އަސާސީ ތަޢުލީމުގެ މަޝްރޫއު ޢާއި، ސަރުކާރުން އެ ކަމަށް ދިން އިސްކަމާއި، ކުރި ޚާއްޞަ މަސައްކަތޔގެ ސަބަބުން ހޭލުންތެރިކަން އުފެދި އަދި ސްކޫލްތަކުގައި ވެސް ޤުރުއާން ކިޔަވައި ދިނުމަށް ދިން ސަމާލުކަމުގެ ސަބަބުން ކަމަށެވެ.
މިނިސްޓަރު ވިދާޅުވީ ދީނީ ރޫޙު އާލާވެ، ޚާއްޞަކޮށް ޤުރުއާން ކިޔެވުމަށް ބޮޑު ސަމާލުކަމެއް މިއަދު ދެވިފައި ވަނީ މައިންބަފައިންނާއި، ސުކޫލުތަކުން އެ ކަމަށްޓަކައި ވަމުންދާ ޤުރުބާނީގެ ސަބަބުން ކަމަށެވެ. އަދި އެއީ އެންމެން ވެސް ޤަބޫލު ކުރަން ޖެހޭ ޙަޤީޤަތެއް ކަމަށް ވިދާޅުވި އެވެ.
އޭނަ ފާހަގަ ކުރެއްވި ގޮތުގައި ދިމާވާ ބޮޑެތި މުސީބާތްތަކާއި، އެކިއެކި ބަލިމަޑުކަމުން ސަލާމަތްވުމުގައި ވެސް އެންމެ ބޮޑަށް ބޭނުން ކުރަން ޖެހޭ ހަތިޔާރަކީ ކީރިތި ޤުރުއާން ކަމަށެވެ.