ރައްޔިތުންގެ މަޖިލީހުން މަސައްކަތް ކުރަމުން އަންނަނީ ރައްޔިތުން ބޭނުންވާ ސްޕީޑުގައި ކަމަށް މަޖިލީހުގެ ރައީސް އަބްދުއްރަހީމް އަބްދުﷲ މިއަދު ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާ ނިންމަވާލައްވަމުން އަބްދުލްރަހީމް ވިދާޅުވީ ސުޕަ މެޖޯރިޓީ އޮވެގެން މަސައްކަތްކުރަނީ ރައްޔިތުން ބޭނުންވާ ސްޕީޑުގައި ކަމަށެވެ. ރައްޔިތުން އެ މެޖޯރިޓީ ޕީއެންސީއަށް ދިނީ ރައްޔިތުން ބޭނުންވާ ސްޕީޑުގައި މަޖިލިސް ކުރިއަށް ގެންދަންވެގެން ކަމަށާއި މިހާ ބާރަށް ބިލުތަކުގެ ބަހުސްތައް ގެންދަނީ އެ ސަބަބަށްޓަކައި ކަމަށް އަބްދުލްރަހީމް ވިދާޅުވި އެވެ.
"އެ ވާހަކަ ރައްޔިތުންގެ މައުލޫމާތަށްޓަކައި އަޅުގަނޑު މި ދަންނަވާލީ. އެއްގޮތަކަށް ވެސް ރިޔާސަތުން ބަހުސްގައި ބައިވެރިވުމުގެ މަގުސަދެއްގައެއް ނޫން. އެހެންނަމަވެސް، ރައްޔިތުންނަށް މިކަން އެނގެންޖެހޭނެ ކަމެއް ކަމަށް ދެކޭތީ،" އަބްދުލްރަހީމް ވިދާޅުވި އެވެ.
މަޖިލީހުގެ ބޮޑު އަޣުލަބިއްޔަތެއް ރައްޔިތުން ޕީއެންސީ އަށް ދީފައިވަނީ ރައީސް ޑރ. މުހައްމަދު މުއިއްޒު ރައްޔިތުންނަށް ވެވަޑައިގެންނެވި ވައުދުފުޅުތައް ފުއްދުމަށްޓަކައި މަޖިލީހުން ދޭންޖެހޭ އެއްބާރުލުމާއި އެހީތެރިކަން ދިނުމަށް މަގުފަހިކޮށްދިނުމުގެ ގޮތުން ކަމަށްވެސް އަބްދުލްރަހީމް ވިދާޅުވި އެވެ.
އެ މަގުސަދު މަޖިލީހުން ހާސިލުކޮށްދޭނެކަމުގެ ޔަގީންކަން ދިވެހި ރައްޔިތުންނަށް އަރުވާ ކަމަށް ވެސް އަބްދުލްރަހީމް ވިދާޅުވި އެވެ.