އިންޑޮނީޝިއާގެ އަލިފާން ފަރުބަދައެއް މިއަދު ގޮވައި 10 މީހަކު މަރުވެއްޖެ އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ގޮވާފައި ވަނީ އެ ގައުމުގެ އިރުމަތީ ސަރަހައްދުގެ ފްލޮރެންސް އައިލޭންޑްގެ މައުންޓް ލެވޮޓޯބީ ލަކި-ލަކި އެވެ. މި ފަރުބަދަ ގޮވައި، ހަތް އަވަށަކަށް އޭގެ އަސަރުކޮށްފައިވެ އެވެ. އެގޮތުން ބުރައިގެން ދިޔަ ދިޔާ އަލިފާނާއި ހިލައިގެ ސަބަބުން އާންމުންގެ ބައެއް ގެތައް ވެސް ރޯވެފައިވާ ކަމަށް މީޑިއާތަކުން ބުންޏެވެ.
އެހެންވެ އަލިފާން ފަރުބަދަ ގޮވައި ގެއްލުންތައް ލިބުނު އަވަށްތަކުން މީހުން ހުސްކުރުމުގެ މަސައްކަތް ވެސް މިއަދު ހެނދުނު ކޮށްފައިވެ އެވެ. މި ގޮވުމުގެ އަސަރުކުރި މީހުންގެ އަދަދު 10،000 އަށް އަރަ އެވެ.
އިންޑޮނީޝިއާގެ ޑިޒާސްޓާ އެޖެންސީން ބުނި ގޮތުގައި އަލިފާން ފަރުބަދަ ގޮވުމުގެ ސަބަބުން ކުރިއަށް އޮތް ދުވަސްތަކުގައި ވެސް އަވަށްރަކަށް ދިޔާ އަލިފާނުގެ އަސަރުކުރުމުގެ ފުރުސަތު ބޮޑެވެ. އެހެންވެ ރައްކާތެރިކަމުގެ ފިޔަވަޅުތައް އަޅަން އިލްތިމާސްކޮށްފައިވެ އެވެ. އަދި ކުރިއަށް އޮތް 58 ދުވަހަށް އެ ސަރަހައްދުގައި ވަނީ ކުއްލި ހާލަތު އިއުލާންކޮށްފަ އެވެ.
މީޑިއާތަކުން ބުނި ގޮތުގައި މިދިޔަ އަހަރުގެ ޑިސެމްބަރު މަހުން ފެށިގެން އެކި ފަހަރު މަތިން މައުންޓް ލެވޮޓޯބީ ލަކި-ލަކި ގޮވާފައިވެ އެވެ.