މަޖުބޫރުކޮށްގެން ޒުވާނުން ސިފައިންގެ އާއި ފުލުހަށް ވެއްދުމަކީ ކުރަން ހެޔޮވާ ވަރުގެ ކަމެއް ނޫން ކަމަށް ކުރީގެ ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެ އެވެ.
ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް ޑރ. މުހައްމަދު މުއިއްޒު ވަނީ ޒުވާނުން ސިފައިންގެ އާއި ފުލުހަށް ވެއްދުމަށް ރާއްޖޭގެ ގައުމީ ހިދުމަތުގެ ޕްރޮގްރާމްގެ ނަމުގައި އަންނަ އަހަރުން ފެށިގެން ގައުމީ ޕްރޮގްރާމެއް ފެށުމަށް ނިންމާފައިވާކަން އިއުލާން ކުރައްވާފަ އެވެ. މި ޕްރޮގްރާމްގައި އުމުރުން 16 އަހަރުވުމަށް ފަހު ތައުލީމު ހާސިލުކުރަން މައްޗަށް ދިޔުމަށް ފުރުސަތު ނުލިބޭ ކުދިންނާއި އަދި ވަޒީފާއެއް ވެސް ނުލިބޭ ކުދިން ބައިވެރިވާންޖެހޭނެ ކަމަށް ރައީސް ވިދާޅުވި އެވެ.
މިކަމާ ގުޅިގެން ޔުމްނާ "އެކްސް"ގައި ކުރެއްވި ޕޯސްޓެއްގައި ވިދާޅުވީ ކޮންމެ ކުއްޖަކީ ހިސާބަށް ނުވަތަ އިނގެރޭސި ބަހަށް މޮޅު ނުވެދާނެ ކަމަށާއި ނަމަވެސް ކޮންމެ ކުއްޖެއްގެ ވެސް ފަންނެއް ނުވަތަ ހުނަރެއް ހުންނާނެ ކަމަށެވެ. ރާއްޖޭގައި ފަންނުވެރި ހުނަރުވެރި ކުދީން ގިނަ ކަމަށާއި އެ ކުއްޖެއްގެ ކިބައިގައި ހުންނަ ފަންނެއް ނުވަތަ ހުނަރެއް ކުރިއެރުވޭނެ ހޯދައިދިނުން މުހިއްމު ކަމަށް ޔުމްނާ ވިދާޅުވި އެވެ.
"ފަންނުވެރިކަމުގެ ދާއިރާއިން ނުވަތަ ކުޅިވަރުގެ ދާއިރާއިން ނުވަތަ ޓެކްނޮލަޖީީގެ ދާއިރާއިން މަތީ ތަޢުލީމު ހޯދޭނެ ފުރުސަތުތައް ފަހިކޮށްދޭންވީ،" ޔުމްނާ ވިދާޅުވި އެވެ.
އުފެއްދުންތެރި އިޤްތިޞާދެއް ބިނާކުރެވޭނީ މިފަދަ ކުދީންނަށް ފުރުސަތު ހޯދައިދީގެން ކަމަށާއި ދަށް ކުދީން ގޮތުގައި ލޭބަލްކޮށް 16 އަހަރުގައި، މަޖުބޫރުކޮށްގެން ޕޮލިހަށް ނުވަތަ ސިފައިންގެ އަށް ވެއްދުމަކީ ކުރަން ހެޔޮވާވަރު ކަމެއް ނޫން ކަމަށް ވިދާޅުވި އެވެ.
ރައީސް ވިދާޅުވީ މި ޕްރޮގްރާމްގެ ނަތީޖާއެއްގެ ގޮތުން ސިފައިންގެއަށް 4،000 އޮފިސަރުން އަދި ފުލުހުންގެ ހިދުމަތަށް 1،000 އޮފިސަރުން އިތުރުވެގެންދާނެ ކަމަށެވެ. މި ޕްރޮގްރާމް ހިންގުމަށް 400 މިލިއަން ރުފިޔާ ބަޖެޓުން ހަރަދުކުރާނެ ކަމަށާއި އަދި ކޮންމެ އަހަރަކު އިތުރު 400 މިލިއަން އެ ޕްރޮގްރާމް އިތުރު ކުރެވޭނެ ކަމަށްވެސް ވިދާޅުވި އެވެ.