އެމްޑީޕީން ބުނާ ގޮތަށް ބަޖެޓް ހަދައިފިނަމަ ރާއްޖެ ބަނގުރޫޓުވާނެ ކަމަށް ބާރަށު ދާއިރާގެ ޕީއެންސީ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
މިދިޔަ ބުރާސްފަތި ދުވަހު ސަރުކާރުން މަޖިލީހަށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ.
ސަރުކާރު ހިންގާ، ޕީޕަލްސް ނޭޝަނަލް ކޮންގްރެސް ޕާޓީ (ޕީއެންސީ) އިން އަލަށް ފެށި 'ރައްޔިތުންގެ ސައްލާ' ގައި ރޭ ވާހަކަދައްކަމުން ޝުޖާއު ވިދާޅުވީ އަންނަ އަހަރަށް ލަފާކުރާ ބަޖެޓް ތައްޔާރުކޮށްފައިވަނީ ވޯލްޑް ބޭންކާއި އައިއެމްއެފް ފަދަ ބޭރުގެ މާލީ އިދާރާތަކުން ދިން އިރުޝާދުތަކަށް ވަރަށް ބޮޑަށް ރިއާޔަތްކުރުމަށްފަހު ކަމަށާއި ބަޖެޓް ހަދާނެ ގޮތް އެމްޑީޕީން ކިޔާދޭން ނުޖެހޭ ކަމަށެވެ.
"އެމްޑީޕީން އަޅުގަނޑުމެންނަށް ދައުލަތުގެ ބަޖެޓް ހަދާނެގޮތް ކިޔާދޭން ނޫޅުއްވާށޭ. ތިގޮތަށް ތިބޭފުޅުންގެ ލަފަޔާއި އިރުޝާދު ހޯދައިގެން އަޅުގަނޑުމެން ބަޖެޓް ހަދައިފިއްޔާ ކުރިޔަށް އޮތް ދެމަސްތެރޭ ބަނގުރޫޓުވާނެ ގައުމު. އެހެންވީމާ އެމްޑީޕީން ދައުލަތުގެ ބަޖެޓް ތައްޔާރުކުރާނެ ގޮތް ޕީއެންސީއަކަށް ކިޔާދޭކަށް ނުޖެހޭނެ. އަދި އެކަން އަޅުގަނޑުމެން އަޑެއްވެސް ނާހާނެ ވާހަކަ ދަންނަވަން،" ޝުޖާއު ވިދާޅުވި އެވެ.
އެމްޑީޕީ ސަރުކާރުން އާމްދަނީ އިތުރުކުރީ ޖީއެސްޓީ އާއި ޓީޖީއެސްޓީ އަދި ސްޓިކާ ޖެހުން ފަދަ ކަންކަން ކޮށްގެން ކަމަށާއި އަންނަ އަހަރުގެ ބަޖެޓު ހަދާފައިވަނީ، ރައީސް ޑރ މުހައްމަދު މުއިއްޒު، އެމަނިކުފާނުގެ އަމިއްލަފުޅު ވަގުތު ހޭދަކުރައްވައިގެން، އެމަނިކުފާނުގެ އަމިއްލަ އިސްނެންގެވުމާއެކު ކަމަށްވެސް ޝުޖާއު ވިދާޅުވި އެވެ.