އއ. އަތޮޅުގެ ސްކޫލުތަކުގެ އިސްވެރީންނަށް ހާއްސަކޮށްގެން ލީޑަޝިޕް ޓްރޭނިން ޕްރޮގްރާމެއް ކުރިޔަށް ގެންގޮސްފި އެވެ.
އުކުޅަހުގައި ކުރިއަށް ދިޔަ އެ ޕްރޮގްރާމްގައި އެ އަތޮޅުގެ ސްކޫލުތަކުން ޖުމްލަ 52 މީހަކު ބައިވެރިވި އެވެ.
ވޯކްޝޮޕް ފެސިލިޓޭޓްކޮށް ދެއްވީ އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ ޝިފާޒް މުޙައްމަދާއި އިސްކަންދަރު ސްކޫލުގެ ޕްރިންސިޕަލް މުޙައްމަދު ޝުކުރީގެ އިތުރުން ޞަލާޙުއްދީން ސްކޫލުގެ ޑެޕިއުޓީ ޕްރިންސިޕަލް ޒަހީނާ ޢަބްދުﷲ އެވެ.
އެ ބޭފުޅުންގެ ތަޖުރިބާގެ އަލީގައި ބައިވެރިންނަށް ސްކޫލް ކުރިއެރުވުމާއި، ސުޕަވައިޒްކުރުމާއި، ލަނޑުދަނޑިތައް ކަނޑައެޅުމާއި، އަދި މީހުންނާ މުޢާމަލާތް ކުރުމުގެ ހުނަރުތައް ފަދަ މުހިންމު ދާއިރާތަކުން ލީޑަޝިޕްގެ ހުނަރުތައް ތަރައްޤީކުރުމުގެ ތަމްރީންތައް ދީފައިވެ އެވެ.
މި ވޯކްޝޮޕްގެ މައިގަނޑު މަގުސަދަކީ ސްކޫލްތައް ހިންގުމުގައި ބޭނުންކުރާ ޒަމާނީ އާ ގޮތްތަކާއި، އާ އީޖާދުތަކާ ގުޅޭ މަޢުލޫމާތު ޕްރިންސިޕަލުންނަށް ހިއްސާކޮށް އަހުލުވެރިކުރުވުމެވެ. އެޑިއުކޭޝަން މިނިސްޓްރީން ބުނީ މިފަދަ ވޯކްޝޮޕްތަކުގެ ސަބަބުން ސްކޫލުތަކުގެ ވެރިންނަށް އެ ފަރާތްތަކުގެ މަސައްކަތުގެ މާޙައުލުގައި ދިމާވާ ޚާއްޞަ ގޮންޖެހުންތަކަށް އަމާޒުކޮށްގެން ޙައްލުތައް ހޯދުމަށް މަގުފަހިވެގެން ދާނެ ކަމަށެވެ. މީގެ އިތުރުން، ބައިވެރިންގެ މެދުގައި ނެޓްވޯކެއް އުފެދި، ކުރިމަގުގައި އެއް ބަޔަކު އަނެއް ބަޔަކަށް އެހީތެރިވެ، މަޢުލޫމާތު ޙިއްޞާ ކުރުމަށް ވެސް މަގުފަހިވެގެން ދާނެ އެވެ.
މި ސިލްސިލާގެ ވޯކްޝޮޕްތައް މިހާތަނަށް ގދ، ގއ، ކ، މާ، އައްޑޫ، ފުވައްމުލަކުގެ އިތުރުން މ އަދި ވ. އަތޮޅުގައި ވެސް ހިންގާފައިވެ އެވެ.