އަންނަ އަހަރު މޯލްޑިވްސް ޒަކާތު ހައުސްގެ ބިލްޑިން އަޅަން ފަށާނެ ކަމަށް އިސްލާމިކް މިނިސްޓަރު ޑރ. މުހައްމަދ ޝަހީމް އަލީ ސައީދު ވިދާޅުވެއްޖެ އެވެ.
ވަން.ގަވް މެދުވެރިކޮށް ޒަކާތު ހައުސްގެ ހިދުމަތް ދިނުން ތައާރަފު ކުރަން އިއްޔެ ބޭއްވި ރަސްމިއްޔާތުގައި މިނިސްޓަރު ވިދާޅުވީ ޒަކާތު ހައުސް ބިލްޑިން އަޅަން ހުޅުމާލެއިން މިހާރު ވަނީ ބިމެއް ވެސް ހަމަޖެހިފައި ކަމަށެވެ.
"މޯލްޑިވްސް ޒަކާތު ހައުސްގެ ބިލްޑިން އެޅުމަށްޓަކައި މިހާރު ވަނީ ބިމެއް ހަމަޖެހިފައި. އެކަން މިނިސްޓްރީއަށް މިހާރު ވަނީ އަންގާފައި،" އޭނަ ވިދާޅުވި އެވެ. "އެ ބިން މިލްކު ކުރުމުގައި ކުރިއަށްދާ ޕްރޮސީޖާތައް މިހާރު އަޅުގަނޑުމެން ވާނީ ފަށާފައި." ޝަހީމް ވިދާޅުވި އެވެ.
އެހެންވެ އެ އިމާރާތުގެ އަމަލީ މަސައްކަތް އަން އަހަރު ފެށުމަކީ އަމާޒެއް ކަމަށް މިނިސްޓަރު ވިދާޅުވި އެވެ. އޭނަ ވިދާޅުވީ
ރާއްޖޭގެ ޒަކާތު ހައުސްވެގެން ދާނީ ކުރިއަށް އޮތް ތަނުގައި މުހިންމު ގައުމީ އިދާރާއަކަށް ކަމަށެވެ. އަދި އިސްލާމީ ދުނިޔޭގައި ފާހަގަކޮށްލެވޭ މުހިންމު މުއައްސަސާއަކަށް އެތަން ވާނެ ކަމަށް ވެސް ވިދާޅުވި އެވެ.
ރާއްޖޭގެ ޒަކާތުގެ ދާއިރާ ހަރުދަނާ ކުރަން ސަރުކާރުން ޒަކާތު ހައުސްގެ ނަމުގައި އިދާރާއެއް އުފެއްދެވީ މިދިޔަ އަހަރުގެ ޑިސެމްބަރު މަހުގެ 18 ގަ އެވެ. އެތަން ރަސްމީކޮށް އިފުތިތާހުކުރީ މި އަހަރުގެ ޖެނުއަރީ 2 ގަ އެވެ.