ބޭންކް އޮފް މޯލްޑިވްސް (ބީއެމްއެލް) އިން ވިޔަފާރިތަކުން ކޮންމެ ދުވަހަކު ވެސް ކުރާ ހަރަދުތައް މެނޭޖު ކުރުމަށް ހާއްސަ ޕްރިޕެއިޑް ކާޑެއް މިއަދު ލޯންޗްކޮށްފި އެވެ.
ހޮޓެލް ޖެންގައި ގައުމީ ބޭންކުން ލޯންޗްކުރި މި ކާޑަކީ އިންޓަނެޓް ބޭންކިން ވެސް ފެންނަ ރުފިޔާ އަދި ޑޮލަރު ކާޑެވެ. އެގޮތުން ރުފިޔާ ކާޑުތައް ރާއްޖޭގައި ބޭނުން ކުރެވޭ އިރު، ޑޮލަރު ކާޑު ރާއްޖެ އާއި ބޭރުގައި ވެސް ބޭނުން ކުރެވޭނެ އެވެ. ބީއެމްއެލް އިން ބުނީ ވިޔަފާރިތަކަށް ހާއްސަ ޕްރީޕެއިޑް ކާޑެއް އޮތުމުގެ އެންމެ ބޮޑު ފައިދާ އަކީ އެ ދުވަހަކަށް ބޭނުންވާ ވަކި އަދަދެއް ޓޮޕްއަޕްކޮށްގެން ބޭނުން ކުރެވޭ ގޮތަށް ކާޑު ފަރުމާކޮށްފައިވުމާއި ލިމިޓްތަކެއް ވެސް ހުރުން ކަމަށެވެ.
މި ކާޑުތައް އޭޓީއެމާއި ޕީއޯއެސް އަދި އީިކޮމާސްގައި ވެސް ބޭނުން ކުރެވޭނެ އެވެ.
މި ކާޑްތަކުން ދުވާލަކު 200،000ރ. އާ ހަމައަށް ޓްރާންސެކްޝަން ހެދޭނެ އިރު، ކަމަށާއި ގިނަ ވެގެން 500،000ރ. އާ ހަމައަށް ރީލޯޑް ކުރެވޭނެ އެވެ. ޑޮލަރު ކާޑުން ވިޔަފާރިތަކަށް ދުވާލަކު 50،000 ޑޮލަރުގެ ޓްރާންސެކްޝަން ހެދޭނެ އެވެ. އަދި ރީލޯޑް ކުރެވޭނެ އެންމެ މަތީ ލިމިޓަކީ 100،000 ޑޮލަރެވެ.
ބީއެމްއެލް މޯބައިލް އެޕްގެ ވޮލެޓް ޕޭމަންޓްތަކަށް ވެސް އެ ކާޑުތައް ބޭނުން ކުރެވޭނެ އެވެ. މި ކާޑުތައް ބޭނުންކޮށްގެން ވިޔަފާރިތަކަށް ޒޯހޯގެ ޕްރޮޑަކްޓްތަކުން 35 ޕަސަންޓާ ހަމައަށް ޑިސްކައުންޓް ވެސް ލިބެ އެވެ.
ބީއެމްއެލް އިން ވަނީ ހެނދުނު 10:00 އިން ހަވީރު 5:00 އަށް ވިޔަފާރިތަކަށް ހުޅުވާލައިގެން އެކްސްޕޯއެއް ވެސް ބާއްވަމުންނެވެ.