ބޯހިޔާވަހި ކަމަށް ހާއްސަކޮށްހެން މިއަދު އިފުތިތާހުކުރި 'ހިޔާވަހި ފައިނޭންސިން ސްކީމް" އަކީ ދާއީމީ ގޮތެއްގައި ކުރިއަށް ގެންދާނެ ސްކީމެއް ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެ އެވެ.
އެ އިފުތިތާހުކޮށް ދެއްވައި ރައީސް މިއަދު ވިދާޅުވީ މިއީ ކުރިއަށް އޮތް ހަތަރު އަހަރު ވެސް ކުރިއަށް ގެންދާނެ ސްކީމެއް ކަމަށެވެ. އަދި އެކަމަށް ކޮންމެ އަހަރަކު ވެސް ސަރުކާރުގެ ބަޖެޓުގައި އެއް ބިލިއަން ރުފިޔާ ހިމަނާނެ ކަމަށް ވިދާޅުވި އެވެ.
"މިއީ މިއަދު ފަށައިފައި މި އަންނަ އަހަރު ހުއްޓައިލައި ސްކީމެއް ނޫން. މިއީ ދާއިމަށް އިރާދަކުރެއްވީތީ ކޮންމެ އަހަރަކު ވެސް ކުރިއަށް ގެންދާނެ މަޝްރޫއެއް،" ރައީސް ވިދާޅުވި އެވެ. "މި އަހަރު މި ފާސްކުރަން ހުށަހަޅައިފައި އޮތް މި އަންނަ އަހަރުގެ ބަޖެޓުގައި، މި ސްކީމް، މިއަދު މި އިއުލާނުކުރި ސްކީމް ކުރިއަށް ގެންދިއުމަށް އެއް ބިލިއަން ރުފިޔާ ސަރުކާރު ބަޖެޓުން ކަނޑައަޅާފައި ވާނެ."
ރައީސް ވިދާޅުވީ ބިލިއަނެއް އިންވެސްޓުކޮށްގެން ދެ ބިލިއަނަށްވު ރެ ރުފިޔާގެ ލޯނު އަހަރުތެރޭ ދޫކުރެވޭނެ ކަމަށެވެ.
"އެއް ބިލިއަން ރުފިޔާ އިންވެސްޓުކުރެވިގެން ޚަރަދުކުރެވިގެންދާނީ މި ރޭވިފައި އޮތް ގޮތުންކަމުގައިވާތީވެ އިފެކްޓިވްލީ ހަގީގަތުގައި ދެ ބިލިއަނަށް ވުރެ ގިނަ ރުފިޔާގެ ލޯނު މި ސްކީމްގެ ދަށުން ދެންމެ މި އިއުލާނުކުރެވުނު އެއް ބިލިއަން ރުފިޔާގެ ކެޕްގެ ދަށުގައި." ރައީސް ވިދާޅުވި އެވެ.
ރައީސް ވިދާޅުވި ގޮތުގައި މިއީ ގެދޮރު ބިނާކުކުރެވި ތިބި މީހުންނަށް އެ ފުރުސަތު ވަރަށް ބޮޑަށް ފަހިވާނެ ސްކީމެކެވެ.
"މި ލޯނު ސްކީމުގެ ސަބަބުން އިރާދަކުރެއްވިއްޔާ އެތައް ހާސް ރައްޔިތަކަށް އެ މަގުފަހިވެގެން އެބަދޭ." ރައީސް ވިދާޅުވި އެވެ.
"ހިޔާވަހި ފައިނޭންސް ސްކީމް" އަށް މި ހަފުތާގެ ތެރޭގައި ހުޅުވައިލާނެ ކަމަށް ވެސް ރައީސް ވިދާޅުވި އެވެ.