ޖަޕާނުން ތައްޔާރުކުރި ލަކުޑި ސެޓެލައިޓް ލޯންޗްކޮށްފި އެވެ.
"ލިގްނޯސެޓްގެ ނަން ދީފައިވާ ދުނިޔޭގެ ފުރަތަމަ ލަކުޑި ސެޓެލައިޓް، ފުރަތަމަ ޓެސްޓް ލޯންޗްގެ ގޮތުގައި ފޮނުވައިލީ މިއަދު އެވެ.
އެ ޑިވޮޕްކުރީ ކިއޯޓޯ ޔުނިވަސިޓީ އާއި ގެދޮރު އިމާރާތްކުރާ ކުންފުންޏެއް ސުމިޓޯމޯ ފޮރެސްޓްރީ ގުޅިގެންނެވެ. މި މަސައްކަތުގައި އެންމެ އިސްކޮށް ހުރީ ކިއޯޓޯ ޔުނިވަސިޓީގެ ޕްރޮފެސަރު އަދި 2008 ގައި އިންޓަނޭޝަނަލް ސްޕޭސް ސްޓޭޝަަން (އައިއެސްއެސް) އަށް ވެސް ދިއުމުގެ ފުރުސަތު ލިބުނު އެސްޓްރޮނޯޓް ޓަކާއީ ޑޯއީ އެވެ.
"ލިގްނޯސެޓް" އައިއެސްއެސް ސަަރަހައްދަށް ސްޕޭސް އެކްސް ގުޅިގެން ފޮނުވަން ނިންމާފައިވާ އިރު، ފަހުގެ ތާރީހެއްގެ ދުނިޔޭގެ އޯބިޓަށް، ދުނިޔެއާ ގާތްގަނޑަކަށް 400 ކިލޯމީޓަރު (250 މޭލު) އަށް ފޮނުވައި ހައެއްކަ މަސް ދުވަސް ހޭދަކޮށް، އެކި ކަހަލަ މައުލޫމާތުތައް އެއްކުރާނެ އެވެ.
ލަކުޑި ސެޓެލައިޓެއް އުފެއްދުމުގެ މަސައްކަތް ޖަޕާނުން ފެށީ 2020 ގެ ފަހުކޮޅު އެވެ. އޭރު އަމާޒަކަށްވެފައި އޮތީ މިދިޔަ އަހަރުގެ ތެރޭގައި ސެޓެލައިޓްގެ މަސައްކަތް ނިންމައި ލޯންޗްކުރުމެވެ.
ކިއޯޓޯ ޔުނިވަސިޓީން ބުނި ގޮތުގައި ލަކުޑި ސެޓެލައިޓް ވާނީ ވަރަށް ބޭނުންތެރި އެއްޗަކަށެވެ. ސަބަބަކީ މިހާރު ސެޓެލައިޓް އުފައްދާފައި ހުންނަ މެޓިރީއަލްތަކުން ބައިތައް ފަސޭހައިން ހަލާކުވެ، އެކި ބާވަތުގެ ނުރައްކާތެރި ވިހަ މާއްދާތައް ވެސް އެކުލެވޭ ބައިތައް ޖައްވުގެ ތެރެއަށް ދިއުމާއި ބިމަށް ވެއްޓުން ފަދަ މައްސަލަތައް ވެސް ކުރިމަތިވަމުން ދިއުމެވެ. ނަމަވެސް ލަކުޑި ސެޓެލައިޓުން މިފަދަ މައްސަލަތައް ހައްލުކޮށް ދޭނެ ކަމަށް އެ ޔުނިވަސިޓީން ބުންޏެވެ.
އެގޮތުން ތިމާވެއްޓާ ރައްޓެހި "ލިގްނޯސެޓް" އުފައްދާފައި ވަނީ ވެސް ހާއްސަ ލަކުޑިއަކުންނެވެ. އަދި އެ އުފައްދާފައި ވަނީ އިހުގައި ޖަޕާނުގައި ބޭނުން ކުރަމުން އައި ކްރާފްޓިން ޓެކްނިކް ބޭންކޮށްގެންނެވެ. އެހެންވެ މީގައި ތެރަހައެއް، އިސްކުރެއް ވެސް ބޭނުންކޮށްފައި ނުހުންނާނެ އެވެ.
ކިއޯޓޯ ޔުނިވަސިޓީން ބުނި ގޮތުގައި ލަކުޑި ސެޓެލައިޓްގެ މައިގަނޑު އެއް ފައިދާއަކަށް ވާނީ އެއިން އެއްޗަކުން ބައެއް ދުނިޔޭގެ ބިމަށް ވެއްޓުނަސް އޭގެ މާ ބޮޑު ނުރައްކަލެއް ނެތުމެވެ.
ކިއޯޓޯ ޔުނިވަސިޓީއާ އެކު ލަކުޑި ސެޓެލައިޓް އުފައްދަން އަތުގުޅައިލި ސުމިޓޯމޯ ފޮރެސްޓްރީ އަކީ މީގެ 400 އަހަރު ކުރިން ވުޖޫދަށް އައި ސުމިޓޯމޯ ގްރޫޕްގެ ސަބްސިޑަރީއެކެވެ. އެ ކުންފުންޏަކީ މޫސުމަށް އަންނަ ބަދަލުތަކާ ދެކޮޅަށް ކުރާ މަސައްކަތުގައި ލަކުޑީގެ އުފެއްދުންތައް ތައްޔާރުކުރަން އަރާހުރި ވަރަށް ތަޖުރިބާކާރު ކުންފުންޏެކެވެ.
ސުމިޓޯމޯ ފޮރެސްޓްރީން ބުނި ގޮތުގައި ސެޓެލައިޓް ހަދަން ބޭނުންކުރާ ލަކުޑި އަކީ "އާރްއެންޑީ ސީކްރެޓް" އެކެވެ.
ވޯލްޑް އިކޮނޮމިކް ފޯރަމް (ޑަބްލިއުއީއެފް) އިން ބުނެފައިވާ ގޮތުގައި ދުނިޔޭގެ ޖައްވުގެ ތެރޭގައި މިހާރު 7،500 އަށް ވުރެ ގިނަ ސެޓެލައިޓްތައް އެބަހުއްޓެވެ. އަދި އޭގެ ތެރެއިން 60 ޕަސަންޓަކީ "ސްޕޭސް ޖަންކް" އެވެ.