ސިޔާސީ ޕާޓީތައް 100،000ރ. އިން ޖޫރިމަނާ ކުރެވޭ ގޮތަށް ސިޔާސީ ޕާޓީތަކުގެ ގާނޫނަށް ހުށަހެޅި އިސްލާހު ރައްޔިތުންގެ މަޖިލީހަށް ބަލައިގަނެފި އެވެ.
ގާނޫނަށް މި އިސްލާހު ހުށަހެޅުއްވީ ސަރުކާރުގެ ފަރާތުން ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މި ބިލް މަޖިލީހަށް ބަލައިގަންނަން ފެންނަ ކަމަށް 60 މެންބަރުން ވޯޓު ދެއްވިއިރު ނުފެންނަ ކަމަށް ފަސް މެންބަރުން ވޯޓު ދެއްވި އެވެ.
މި ބިލް މަޖިލީހަށް ބަލައިގަތުމަށް ފާސްވުމުން މި ބިލް ދިރާސާކުރަން ފޮނުވީ މުޅި މަޖިލީހުގެ ކޮމިޓީއަށެވެ.
ބިލުގައިވާ ގޮތުން ސިޔާސީ ޕާޓީއެއްގެ މެންބަރަކު ގާނޫނާ ހިލާފު ކަމެއް ކޮށްފި ނަމަ، އެ މީހަކު ޖޫރިމަނާ ކުރުމުގެ އިތުރުން، އެ މީހަކު ނިސްބަތްވާ ޕާޓީ 100،000ރ. އިން ޖޫރިމަނާ ކުރެވޭނެ އެވެ. މީގެކުރިން އޮންނަ ގޮތުން ސިޔާސީ ޕާޓީއަކަށް ނިސްބަތްވާ މީހަކު ގާނޫނާ ހިލާފު ކަމެއް ކޮށްފިނަމަ 30،000ރ. އާއި 75،000ރ. އާ ދެމެދުގެ އަދަދަކުން ޖޫރިމަނާ ކުރެވޭނީ އެ މީހެކެވެ.