ރައީސް ޑރ. މުހައްމަދު މުއިއްޒު މަސްވެރިންނަށް ވެވަޑައިގެންނެވި 48 ގަޑިއިރު ތެރޭގައި ކިރާ މަހަށް ފައިސާދޭ ވައުދުފުޅު ހަނދާނުގައި އެބަހުރި ކަމަށާއި އެ ވައުދަށް ބަދަލެއް އައިސްފައި ނުވާ ކަމަށް ފިޝަރީޒް މިނިސްޓަރ އަހުމަދު ޝިޔާމް ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ޝިޔާމް ވިދާޅުވީ 48 ގަޑިއިރު ތެރޭގައި މަސްވެރިންނަށް ފައިސާދޭނެ ވައުދަކީ މި ސަރުކާރުން ފިލާނެ ވައުދެއް ނޫން ކަމަށާއި މި ސަރުކާރުގައި މަސްވެރިކަމާއި ގުޅޭ ވައުދެއްނަމަ ނުފުއްދާ ނުތިއްބަވާނެ ކަމަށެވެ. ނަމަވެސް އެ ވައުދު ފުއްދަން ކުރަންޖެހޭ ވަރަށް ގިނަ ކަންކަން އެބަހުރި ކަމަށް ޝިޔާމް ވިދާޅުވި އެވެ.
"ރަތަމަ ކަމަކީ އާމްދަނީ އިތުރުކުރެވޭނެ ގޮތްތައް އިތުރު ކުރުމާއެކު މަސްވެރިން ސިނާއަތުގައި ހުރި ކަންކަން ހައްލުކުރުން. މަސްވެރި ސިނާއަތުގައި ހުރި މައްސަލަތައް ހައްލުކުރެވޭއިރު ބާނާ މަހަށް ރަނގަޅު އަގެއް ދެވިފައި އަވަހަށް ފައިސާ ދޭނެ ފައިސާވެސް ހުންނާނެ،" ޝިޔާމް ވިދާޅުވި އެވެ.
ޝިޔާމް ވިދާޅުވީ 48 ގަޑިއިރު ތެރޭގައި ފައިސާ ދިނުމުގެ މި ވައުދަކީ ލަސްތަކެއް ނުވެ ފުއްދާނެ ވައުދެއް ކަމަށާއި އެ އަމާޒަށް އެއް އަހަރު ތެރޭގައި މަސައްކަތް ކުރެވިފައިވާއިރު، އެއް އަހަރު ތެރޭގައި އެކަން ނުކުރެވުނީ މާލީ އުނދަގޫތަކުގެ ސަބަބުން ކަމަށެވެ.
"އެ ވައުދު ފުއްދުމުގެ ކަންތައްތައް މިހާރު ވެސް އަޅުގަނޑުމެން މި ކުރަނީ. މިފްކޯ އާއި ފިނޭންސް އާއި އަޅުގަނޑުމެންނާ އެކީގައި. އަދި އެސްޓީއޯ އާއި ބީއެމްއެލްއާ އެކީގައި ވެސް މަސައްކަތްތަކެއް އެބަކުރެވޭ އެކަމުގައި ފަސޭހަ މަގެއް އަޅުގަނޑުމެންނަށް ހޯދަން،" އޭނާ ވިދާޅުވި އެވެ.