ރާއްޖޭގެ ޓޫރިޒަމް އިޝްތިހާރު ކުރަން އިޓަލީގެ މަޝްހޫރު ކްލަބް، ޔުވެންޓަސްއާއެކު ޓޫރިޒަމް މިނިސްޓަރު އިބްރާހިމް ފައިސަލް މަޝްވަރާކޮށްފި އެވެ.
ޔުވެންޓަސްގެ މަންދޫބުންނާއެކު ފައިސަލް މި ބައްދަލުވުން ބޭއްވީ އިނގިރޭސިވިލާތުގައި މިހާރު ކުރިއަށްދާ ދުނިޔޭގެ އެންމެ ބޮޑު އެއް ޓޫރިޒަމް ފެއާ، ވޯލްޑް ޓްރެވަލް މާކެޓް (ޑަބްލިއުޓީއެމް)ގެ ހަވާސާގެ ތެރެއިންނެވެ.
ފައިސަލް "އެކްސް"ގައި ކުރެއްވި ޕޯސްޓެއްގައި ވިދާޅުވީ ޔުވެންޓަސްގެ މަންދޫބުންނާއެކު ބޭއްވުނީ ވަރަށް އުއްމީދީ ބައްދަލުވުމެއް ކަމަށާއި މި ބައްދަލުވުމުގައި ޓޫރިޒަމާއި ކުޅިވަރުގެ ދާއިރާއިން ހުރި ފުރުސަތުތަކާއި ގުޅޭގޮތުން މަޝްވަރާ ކުރެވުނު ކަމަށެވެ. އަދި ދެ ފަރާތް ގުޅިގެން ކުރެވޭ މަސައްކަތުން އުއްމީދަކީ ދުނިޔޭގެ އެކި ކަންކޮޅުތަކުގައި ތިބި ފުޓްބޯޅަ އަށް ލޯބިކުރާ ސަޕޯޓަރުންނާއި ރާއްޖެ ގާތްކޮށްދިނުން ކަމަށް ފައިސަލް ވިދާޅުވި އެވެ.
އެތައް ބަޔަކު ޒިޔާރާތް ކުރާ ވޯލްޑް ޓްރެވަލް މާކެޓް ކުރިއަށް ދާނީ މި މަހުގެ ހަތްވަނަ ދުވަހުގެ ނިޔަލަށެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިދިޔަ ހޯމަ ދުވަހުގެ ނިޔަލަށް ރާއްޖެ އަށް ވަނީ 1،688،228 ފަތުރުވެރިން ރާއްޖެ ޒިޔާރަތްކޮށްފަ އެވެ.
އެވަރެޖްކޮށް ރާއްޖޭގައި މިހާރު ފަތުރުވެރިން ހަފްތާއެއްގެ މުއްދަތަށް މަޑުކުރާއިރު ދުވާލެއްގެ މައްޗަށް ރާއްޖެއަށް ޒިޔާރަތްކުރަނީ 5،464 ފަތުރުވެރިންނެވެ.
ރާއްޖޭގެ މި އަހަރުގެ ޓާގެޓަކީ 2.3 މިލިއަން ޓޫރިސްޓުން ގެނައުމެވެ.