ދުނިޔޭގެ އެންމެ ބޮޑު އެއް ޓޫރިޒަމް ފެއާ، ވޯލްޑް ޓްރެވަލް މާކެޓް (ޑަބްލިއުޓީއެމް)ގައި އައްޑޫ ސިޓީ އިޝްތިހާރުކޮށްފި އެވެ.
އިނގިރޭސިވިލާތުގެ ވެރިރަށް ލަންޑަނުގައި އިއްޔެ ފެށި މި ފެއާ ކުރިއަށް ދާނީ މި މަހުގެ 7 ގެ ނިޔަލަށެވެ.
މި ފެއާގައި ރާއްޖެ ޕްރޮމޯޓްކުރުމުގައި އިސްކޮށް ހަރަކާތްތެރި ވަނީ ރާއްޖޭގެ ޓޫރިޒަމް ޕްރޮމޯޓްކުރަން ސަރުކާރުން އުފައްދާފައިވާ މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އެވެ.
އެމްއެމްޕީއާރްސީގެ ޓީމާއެކު އައްޑޫ މޭޔަރު އަލީ ނިޒާރާއި ބައެއް ކައުންސިލަރުން މިހާރު ތިބީ ލަންޑަނުގަ އެވެ.
ފެއާގައި ރާއްޖޭގެ ރީތިކަން ދައްކާލަން ހާއްސަކޮށްފައިވާ ސްޓޭންޑް މެދުވެރިކޮށް، އައްޑޫގެ ރީތި ކަމާއި އަދި އައްޑޫއާ ގުޅޭ ތަފާތު އެކި މައުލޫމާތުތައް ފޯރުކޮށްދިނުމަށް ވަނީ ހަމަޖެހިފަ އެވެ. މި ސްޓޭންޑަށް ޓޫރިޒަމް މިނިސްޓަރު އިބްރާހިމް ފައިސަލް އިއްޔެ ވަނީ ޒިޔާރަތް ކުރައްވާފަ އެވެ.
އައްޑޫގެ ފަތުރުވެރިކަން ޑަބްލިއުޓީއެމްގައި އިޝްތިހާރު ކުރަނީ މިދިޔަ މަހުގެ 25 ވަނަ ދުވަހު އިފްތިތާހު ކުރި އައްޑޫގެ ޓޫރިޒަމް ބްރޭންޑް "ބިޔޯންޑް ދި އީކްއޭޓަ"ގެ ނަމުގަ އެވެ.
މިއީ ޑަބްލިއުޓީއެމްގައި އައްޑޫގެ ފަތުރުވެރިކަމަށް ހާއްސަކޮށްގެން އިޝްތިހާރު ކުރުމުގެ ހަރަަކާތްތަކެއް ހިންގާ ފުރަތަމަ ފަހަރެވެ.