އިންޑިއާގެ ހިންދޫންގެ ތެރޭގައި ކިޔައި އުޅޭ ހުރާފީ ވާހަކަ ރާމާޔަން އަށް ބިނާކޮށް، ބޮލީވުޑްގެ މަޝްހޫރު ތަރި ރަންބީރް ކަޕޫރާ އެކީ ހަދަމުން އަންނަ ފިލްމު "ރާމާޔަން" ގެ ދެ ބަޔަކަށް ގެނެސްދޭން ނިންމައި، ފުރަތަމަ ބައި 2026 ގައި ރިލީޒްކުރާނެކަން މިއަދު އިއުލާންކޮށްފި އެވެ.
ނަމިތު މަލްއުތުރާ ޕްރޮޑިއުސްކޮށް، ނިތޭޝް ތިވާރީ ޑައިރެކްޓްކުރާ ފިލްމުގެ ދެވަނަ ބައި ސިނަމާތަކަށް ގެންނާނީ 2027 ގަ އެވެ. ދެ ބައި ވެސް ޕްލޭންކޮށްފައި އޮތީ ނޮވެމްބަރުފައި ފާހަގަކުރާ ދިވާލީގެ ތެރޭގައި ގެނެސްދޭ ގޮތަށެވެ.
ބޮޑު ބަޖެޓުން ވަރަށް ގްރޭންޑްކޮށް ހަދާ "ރާމާޔަން" ގެ ޑައިރެކްޓަރު ނިތޭޝް އަކީ "ޑަންގަލް" އާއި "ޗިޗޯރޭ" ފަދަ ކާމިޔާބު ފިލްމުތައް ގެނެސްދިން ޑައިރެކްޓަރެވެ. އޭނަގެ އެންމެ ފަހުގެ ފިލްމަކީ މިދިޔަ އަހަރު ވަރޫން ދަވާއި ޖާންވީ ކަޕޫރާ އެކީ ގެނެސްދިން "ބަވާލް" އިންނެވެ.
ނިތޭޝްގެ ޑްރީމް ޕްރޮޖެކްޓެއްގެ ގޮތުގައި ހަދާ "ރާމާޔަންް" ގެ ކާސްޓްގައި ދެކުނުގެ މަޝްހޫރު ބަތަލާ ސައީ ޕައްލަވީ، ސަނީ ޑިއޯލް އަދި "ކޭޖީއެފް" އިން ވިދި ކަންނާޑާ އެކްޓަރު ޔާޝްގެ އިތުރުން ވެސް ބޮޑު ކާސްޓެއް ހިމެނެ އެވެ.
ރަންބީރު މިހާރު އަންނަނީ 2026 ކުރީކޮޅު ރިލީޒްކުރަން ތާވަލުކޮށްފައިވާ ޑައިރެކްޓަރު ސަންޖޭ ލީލާ ބަންސާލީގެ ލޯބީގެ ފިލްމު "ލަވް އެންޑް ވޯ" ގެ ޝޫޓިން މާދަމާ ފަށަން ތައްޔާރުވަމުންނެވެ. މީގެ ކާސްޓްގައި އޭނަގެ އަންހެނުން އާލިއާ ބަޓްގެ އިތުރުން ވިކީ ކޯޝަލް ވެސް ހިމެނެ އެވެ.
ރަންބީރްގެ އެންމެ ފަހުގެ ފިލްމަކީ މިދިޔަ އަހަރުގެ "އެނިމަލް" އެވެ.