ސްރީ ލަންކާގެ ކުރީގެ ރައީސާ ޗަންދުރިކާ ކުމާރަތުންގާގެ ސެކިއުރިޓީ މިހާރުގެ ސަރުކާރުން ދަށްކޮށްފައިވާ ކަމަށް ވިދާޅުވެ، ކަންބޮޑުވުން ފާޅުކުރައްވައިފި އެވެ.
ޕަބްލިކް ސެކިއުރިޓީ މިނިސްޓްރީ އަށް އޭނަ ފޮނުއްވި ސިޓީއެއްގައި ވިދާޅުވީ ސެކިއުރިޓީ ވަރަށް ބޮޑަށް ދަށްކޮށްފައިވާތީ އަމިއްލަ ފުރާނައާ މެދު ވަރަށް ބޮޑަށް ކަންބޮޑުވެވަޑައިގަންނަވާ ކަމަށެވެ. އަދި ފިރިކަލުން މަހާޖަނާ ޕަކްޗަޔާ ފެބްރުއަރީ 16، 1988 ގައި އަވަހާރަކޮށްލި ގޮތަށް އޭނަ ވެސް އަވަހަރާކޮށްލުމުގެ ބިރު ވަރަށް ބޮޑު އޮތް ކަމަށް ޗަންދުރިކާ ވިދާޅުވި އެވެ.
މީގެ ކުރިން ވެސް އޭނަ އަވަހާރަކޮށްލުމުގެ މަސައްކަތް އެކި ފަހަރު މަތިންކޮށްފައިވެ އެވެ. އެގޮތުން ޗަންދުރިކާ އަވަހާރަކޮށްލަން އުޅުމުގެ ކުށް ސާބިތުވެ އުމުރު ދުވަހުގެ ޖަލު ހުކުމެއް އިއްވި ބަޔަކަށް 2022 ގައި މައާފު މިނިވަންކޮށްފައިވެ އެވެ.
ޗަންދުރިކާ ވިދާޅުވީ މިހާރުގެ ރައިސް އަނޫރަ ކުމާރަ ޑިސަނަޔަކަ ސެޕްޓެމްބަރު މަހު ވެރިކަމަށް ވަަޑައިގަތް ފަހުން ސެކިއުރިޓީ ދަށްކޮށް، ސެކިއުރިޓީ އޮފިޝަލުންގެ އަދަދު ވެސް 50 އިން 30 އަށް މަދުކޮށްފައިވާ ކަމަށެވެ. އެކަމަކު ލަންކާގެ ކުރީގެ ވެރިންތަކެއް ކަމަށްވާ މަހިންދަ ރާޖަޕަކްސާ ހިމާޔަތުގައި 243 އޮފިސަރުން، މައިތުރިޕާލާ ސްރިސީނާގެ ސަލާމަަތަށް 109 އަދި ގޮޓަބަޔާ ރާޖަޕަކްސާގެ ސަލާމަތަށް 200 ސެކިއިރިޓީ އޮފިޝަލުން ހަމަޖައްސާފައިވާ ކަމަށް ޗަންދުރިކާގެ ސިޓީގައި ފާހަގަކޮށްފައިވެ އެވެ.
މިހާރު އުމުރުން 79 އަހަރުގެ ޗަންދުރިކާ ލަންކާގެ ރައީސްކަން ކުރެއްވީ 1994-2005 އަށެވެ. އޭނަ އެ ގައުމުގެ ބޮޑުވަޒީރުކަން ވެސް ދުވަސްކޮޅަކަށް ކުރެއްވި އެވެ.
ޗަންދުރިކާ އަކީ ލަންކާގެ ސިޔާސީ މައިދާނުގައި އެންމެ ނުފޫޒު ގަދަ އެކެކެވެ.