މި ސަރުކާރުން އިއުލާންކޮށްފައި އޮތް ރާއްޖޭގެ 20 އަހަރުގެ ތަރައްގީގެ ގައުމީ ޕްލޭންގެ ތައްޔާރު ކުރުމުގެ މަސައްކަތް މިއަދު ފަށައިފި އެވެ.
މިއީ ޔޫއެންޑީޕީ އާއި އޮސްޓްރޭލިއާ ސަރުކާރުގެ އެހީގައި އެއް އަހަރުގެ ދުވަހުގެ ތެރޭގައި އެކުލަވާލައިި ނިންމަން އަމާޒު ހިފާފައިވާ ޕްލޭނެކެވެ.
ޕްލޭން އެކުލަވާލަން ހަމަޖެހިފައި ވަނީ ކަމާ ބެހޭ ހުރިހާ ފަރާތްތަކާއި ރައްޔިތުންގެ ފުރިހަމަ ހިޔާލާއި މަޝްވަރާ ހޯދައިގެންނެވެ. އެގޮތުން ރަށްރަށުގައި ވެސް މި ޕްލޭނާ ގުޅޭ މަސައްކަތްތަލެއް ކުރިއަށް ގެންގޮސް، އެކި ދާއިރާތަކާއި ސިޔާސީ ޕާޓީތައް ވެސް މަސައްކަތުގައި ބައިވެރި ކުރަން ހަމަޖެހިފައިވެ އެވެ. މި ޕްލޭން އެކުލަވާލުމުގެ މަސައްކަތުގެ ތެރެއިން ގާނޫނީ ބާރުވެރިކަން ހޯދުމަށް ގައުމީ ތަރައްގީގެ ގާނޫނުގެ ބިލެއް އެކުލަވާލައި، އެ ޕްލޭން ދެމެހެއްޓިނިވި ގޮތެއްގައި ތަންފީޒު ކުރުމަށް ބޭނުންވާ އިތުރު ބާރުވެރިކަން ހޯދުމަށް ގާނޫނު އަސާސީއަށް މާއްދާއެއް އިތުރު ކުރުމަށް ވެސް ހަމަޖެހިފައިވެ އެވެ.
މި ޕްލޭންގެ މަސައްކަތް ފެށުމަށް މިއަދު ބޭއްވި ރަސްމިއްޔާތުގައި ހައުސިން މިނިސްޓަރު ޑރ. އަލީ ހައިދަރު ވިދާޅުވީ 20 އަހަރުގެ ޕްލޭން ވާނީ ދެމެހެއްޓިނިވި ގޮތެއްގައި ރާއްޖޭގެ ތަރައްގީ ބައްޓަންކޮށް، ގައުމު ދަތުރު ކުރާނެ ފަހި މިސްރާބެއް ކަނޑައެޅުމަށް އެކުލަވާލެވޭ މުހިންމު މަގު ޗާޓަކަށް ކަމަށެވެ.
"މި ޕްލޭން އެކުލަވާލުމުގައި ރާއްޖޭގެ އެކި ކަންކޮޅުތަކުގައި އޮތް އާންމު ދިރިއުޅުމުގެ ހާލަތު ދެނެގަނެ، ދާއިރާތަކަށް ކުރިމަތިވެފައިވާ ގޮންޖެހުންތަކާއި ދަތިތައް ވަޒަންކޮށް، ހެއްކާއި މައުލޫމާތުގެ އަލީގައި ކަންކަން އިސްލާހުކޮށް ކުރިއަރުވަން ކުރަން ޖެހޭ މަސައްކަތް އިލްމީ ނަޒަރަކުން ދެނެގަނެވޭނެ." އޭނަ ވިދާޅުވި އެވެ.
މި ތަރައްގީގެ ޕްލޭނަށް ބޭރުގެ ތަޖުރިބާކާރުންގެ ފަންނީ ލަފާ އާއި އެހީތެރިކަން ވެސް ހޯދާނެ އެވެ. ނަމަވެސް މުޅި ޕްލޭން އެކުލަވާލުމުގައި އިސްކޮށް އުޅޭނީ ދިވެހިންނެވެ. ކަމަށް ވަނީ ކަނޑައަޅާފަ އެވެ.
ގައުމީ ތަރައްގީގެ 20 އަހަރުގެ ޕްލޭނަކީ ރައީސް ޑރ. މުހައްމަދު މުއިއްޒުގެ ވައުދެކެވެ.