ކަށުކަމާކެމޫގެ ސަނަދު ދޭ އުސޫލަށް ބަދަލެއް ގެނެސްދި އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ސޯޝަލް މިޑިއާ ޕޯސްޓެއްގައި ވިދާޅުވީ ހަ ދާއިރާއަކުން ރާއްޖޭގެ އިސްލާމިކް ޔުނިވަސިޓީން ނުވަތަ ސަރުކާރު ޤަބޫލު ކުރާ އެހެން ކޮލެޖް/ޔުނިވަސިޓީއަކުން ވިޔަސް ކަށުކަމާކެމީގެ (ޖަނާޒާގެ މޮޑިއުލްތައް ހިމެނޭހެން) ކިޔަވައިފައިވާ ނަމަ އިތުރު ކޯހަކާ ނުވަތަ އިތުރު އިމްތިޙާނަކާ ނުލައި (ކަށުކަމާކެމީގެ ސަނަދު) ދޭ ގޮތައް މިނިސްޓްރީން މިހާރު ނިންމާފައިވާ ކަމަށެވެ.
ސަނަދު ދޭން ނިންމާފައި ވަނީ މި ކޯސްތައް ކިޔަވާފައިވާ ނަމަ:
1. ބެޗްލާ އޮފް އިމާމުޝިޕް
2. ބެޗްލާ އޮފް އިސްލާމިކް ސްޓަޑީޒް
3. ޑިޕްލޮމާ އޮފް އިމާމު ޝިޕް
4. އެޑްވާންސް ސެޓްފިކެޓް ފޯ އިމާމްޝިޕް
5. ސެޓްފިކެޓް 3 ފޯ އިމާމްޝިޕް
6. ސެޓްފިކެޓް 3 އިން ޖަނާޒާ
ޝަހީމު ވިދާޅުވީ ދާއިރާތަކުން ކިޔަވާފައިވާ މީހުންނަށް އިތުރު ކޯހަކާ ނުލައި ކަށުކަމާކެމީގެ ހުއްދަ ދޭން ނިންމީ ކަށުކަމާކެމީގެ މަޢުލުމާތާއި ޖަނާޒާއާ ބެހޭ ޢިލްމީ މާއްދާތަކުގެ ނަޒަރީ އަދި ޢަމަލީ ބައިތައް ކިޔަވައިދޭ ކޯސްތަކަކަށްވާތީ ކަމަށެވެ. އަދި ރާއްޖޭގެ ރަށްރަށުގައި ކަށުކަމާކެމީގެ ކަންކަން ކުރަމުން އަންނަ މީހުންގެ ދަތިކަން އޮތުމާއެކު އެކަމަށް އަވަސް ޙައްލެއް ހޯދުމަކީ ވެސް ހުއްދަ ދޭ އުސޫލަށް ބަދަލެއް ގެންނަން ނިންމި ސަބަބެއް ކަމަށް ވިދާޅުވި އެވެ.
އިސްލާމިކް މިނިސްޓްރީން މިހާރު ވެސް އަންނަނީ ރާއްޖޭގެ އެކި ހިސާބުތަކުގައި ޖަމާއަަތްތެރން ތަމްރީނު ޕްރޮގްރާމްތައް ހިންގަމުންނެވެ.