ޞިއްޙީ ގޮތުން ދުޅަހެޔޮ އާދަތަކަށް ހޭލުންތެރިކުރުމާ ގުޅޭ މައުލޫމާތު ދޭން ހެލްތު މިނިސްޓްރީން ބާއްވާ "ހެލްތު އެކްސްޕޯ" މާދަމާ ފަށަން ތައްޔާރުވެއްޖެ އެވެ.
ފަންސާހަށް ވުރެ ގިނަ ބައިވެރިންނާ އެކީ ހުޅުމާލޭ ސެންޓްރަލް ޕާކްގައި ދެ ދުވަހުގެ މުއްދަތަށް ކުރިއަށް ގެންދާ މި އެކްސްޕޯ ފަށާނީ މާދަމާ ރެ އެވެ. އެގޮތުން ބުރާސްފަތި ދުވަހުގެ ރޭގަނޑު 08:00 އިން 11:00 އަށެވެ. އަދި ހުކުރު ދުވަހު ހަވީރު 4:00 އިން 11:00 އާއި ހަމައަށް އެކްސްޕޯ ކުރިއަށް ގެންދާ ގޮތަށް ވަނީ ރާވައިފަ އެވެ.
މި އެކްސްޕޯގެ މަޤްސަދަކީ ދުޅަހެޔޮ މުޖުތަމަޢެއް ބިނާކުރުމަށް ކުރަމުންދާ މަސައްކަތާއި، ޞިއްޙީ ގޮތުން ދުށަހެޔޮ އާދަތަކަށް ހޭލުންތެރިކޮށް މައުލޫމާތު ދިނުމެވެ.
އެކްސްޕޯގެ ނައި ސްޕޮންސަރަކީ ދިރާގެވެ.
މިނިސްޓްރީގެ އިތުރުން ހޮސްޕިޓަލްތަކާއި، ޞިއްޙީ ޚިދުމަތް ދޭ ތަންތަނުގެ އިތުރުން މަދަނީ ޖަމިއްޔާތަކާއި އަމިއްލަ ފަރާތްތަކުން މި އެކްސްޕޯގައި ބައިވެރިވެ މަޢުލޫމާތު ދޭނެ އެވެ. އެގޮތުން ކުޑަކުދިންނަށް ވެސް ބައިވެރިވެވޭ ގޮތަށް ކުރިއަށްދާ މި އެކްސްޕޯގައި ކުޑަކުދިންގެ ހެލްތު ޗެކަޕް، މިންހެޔޮ ކާނާ އާއި ގުޅޭ މައުލޫމާތާއި ހެދިބޮޑުވުމާއި ގުޅޭ މައުލޫމާތާއި ވެކްސިން އަދި އެހެނިހެން ޞިއްޙީ މައުލޫމާތު ފޯރުކޮށް ދޭނެ އެވެ.
"ހެލްތް އެކްސްޕޯ" ގައި ސިއްހީ ދާއިރާ އިން މަތީ ތަޢުލީމު ޙާސިލު ކުރަން ބޭނުންވާ ފަރާތްތަކަށް ހުރި ފުރުޞަތުތަކުގެ މައުލޫމާތު ވެސް ފޯރުކޮށް ދޭނެ އެވެ.