ރާއްޖޭގެ ކުރިއަށް އޮތް 20 އަހަރުގެ ގައުމީ ތަރައްގީގެ ޕްލޭން އެކުލަވާލާ އިރު، ރާއްޖޭގެ ކޮންމެ ރަށަކުން ވެސް އެއަށް ބަސް ބުނުން މުހިއްމު ކަމަށާއި މިއީ ގާނޫނީ ބާރުވެރިކަން ވެސް ލިބޭނެ ޕްްލޭނަލަށް ވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ ޕްލޭނާ ގުޅޭ މަސައްކަތްތައް ފެށުމަށް މިއަދު ބޭއްވި ރަސްމިއްޔާތުގައި ރައީސް ވިދާޅުވީ ސިޔާސީ އޮއިވަރެއްގައި ގައުމުގެ ތަރައްގީގެ ކަންކަމަށް އަބަދު ބަދަލު އަންނަ ނަމަ އޭގެ ފައިދާ ރައްޔިތުންނަށް ނުލިބޭނެ ކަމަށެވެ. އެހެންވެ ދިގު މުއްތަކަށް އެކުލަވައިލާ މި ޕްލޭނަކީ ގާނޫނީ ބާރުވެރިކަން ލިބިގެން ކުރެވޭ މަސައްކަތަކަށް ހަދައި، ގާނޫނޫއަސާސީގެ ތެރެއިން ވެސް ބަލައިގަންނަ މަސައްކަތަކަށް އެކަން ބަދަލު ކުރައްވާނެ ކަމަށް ރައިސް ވިދާޅުވި އެވެ.
ރައީސް ވިދާޅުވި ގޮތުގައި 20 އަހަރަކީ ޖީލެއް ކަމަށާއި ތަރައްގީގެ ޕްލޭން ނިމޭއިރު ޖީލެއްގެ ތަސައްވަރު އެނގިގެން ދާނެ ކަމަށެވެ.
"އިރާދަކުރެއްވިއްޔާ މި ޕްލޭންގެ މަސައްކަތް ރާއްޖޭގެ ހުރިހާ ރަށެއްގައި ކުރިއަށް ގެންދާނަން. ކޮންމެ ރަށެއްގެ ރައްޔިތުން ވެސް މި ޕްލޭނަށް އެއްޗެކޭ ވިދާޅުވާން ޖެހޭ. ކޮންމެ ރަށެއްގެ ރައްޔިތުން ބޭނުންވާ ކަންތައް މީގައި ރެޕްރެޒެންޓްވާން ޖެހޭ،" ރައީސް ވިދާޅުވި އެވެ. "ސިޔާސީ ވިސްނުން ދޫކޮށްލާފައި މިއީ ގައުމީ މަސައްކަތެއްގެ ގޮތުގައި ބަލައިގަނެ ސިޔާސީ ޕާޓީތައް މީގައި ބައިވެރިވާން ޖެހޭ. މިއީ ޖީލެއް ބިނާކުރުމުގެ މަސައްކަތް."
އެ މަނިކުފާނު ޕްލޭން އެކުލަވާލާއިރު ދުނިޔެ އަށް އަންނަ ބަދަލުތައްވެ ސް ބަލަންޖެހޭ ކަމަށާއި ގައުމީ ތަރައްޤީގެ ޕްލޭނަކީ އޭއައި ވެސް ބޭނުންކުރެވިގެން އެކުލެވޭ ޕްލޭނަކަށް ވާން ޖެހޭ ކަމަށެވެ.
ޤައުމީ ތަރައްގިގެ މާސްޓަޕްލޭން އަހަރު ދުވަހުގެ ތެރޭގައި ނިންމުމަކީ ސަަރުކާރުގެ އަމާޒެކެވެ.