ޑެޕިއުޓީ ކޮމިޝަނަރަ ޖެނެރަލް އޮފް ޓެކްސޭޝަންގެ މަގާމަށް ފާތިމަތު އަމީޒާ އައްޔަން ކުރަން ރައްޔިތުންގެ މަޖިލީހުން ފާސްކޮށްފި އެވެ.
އޭނަ އެ މަގާމަށް އައްޔަން ކުރުމަށް ރައީސް ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވީ މިދިޔަ މަހުގެ 23 ގަ އެެވެ. އަޒީމާގެ ނަމާ އެކީ ކުރިން ޑެޕިއުޓީ ކޮމިޝަނަރުގެ މަގާމުގައި ހުންނެވި އަސްމާ ޝަފީއުގެ ނަން ވެސް ރައީސް މަޖިލީހަށް ފޮނުއްވި އެވެ.
އެގޮތުން ދެ ނަމާ މެދު އިގުތިސާދީ ކޮމިޓީން ނިންމި ރިޕޯޓް މިއަދު ހުށަހެޅި އިރު، ދެ ބޭފުޅުން ވެސް މަޤާމަށް އައްޔަންކުރަން ކޮމިޓީ އަށް ފެންނަކަމަށް ރިޕޯޓުގައިވެ އެވެ. ނަމަވެސް މަގާމަށް އައްޔަން ކުރަން ޖެހެނީ އެއް ބޭފުޅަކު ކަމަށްވާތީ އެކަމަށް ނެގި ވޯޓްގައި ޑެޕިއުޓީ ކޮމިޝަނަ ޖެނެރަލް އޮފް ޓެކްސޭޝަންގެ މަޤާމަށް އަމީޒާ އައްޔަންކުރަން ފާސްވީ ވޯޓުގައި ބައިވެރިވެވަޑައިގެންނެވި 64 މެންބަރުންގެ އިއްތިފާގުންނެވެ.
އެހެންވެ އަސްމާގެ ނަމަށް ވޯޓަށް އަހައިފައެއް ނުވެ އެވެ.
އަމީޒާ މިހާރު ހުންނެވީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ އެސިސްޓެންޓް ކޮމިޝަނަ ޖެނެރަލް އެންފޯސްމެންޓްގެ މަޤާމުގަ އެވެ.
ޑެޕިއުޓީ ކޮމިޝަނަ ޖެނެރަލް އޮފް ޓެކްސޭޝަންގެ މަޤާމަށް އާ ބޭފުޅަކު އައްޔަން ކުރަނީ އަސްމާގެ މަޤާމުގެ މުއްދަތު މިދިޔަ މަހުގެ 31 އަށް ހަމަވެފައިވާތީ އެވެ.