ކުރީގެ ރައީސުންނަށް ދޭ އިނާޔަތް ކުޑަކުރަން ވިލިމާލެ ދާއިރާގެ ޕީއެންސީ މެންބަރު މުހައްމަދު އިސްމާއީލް ގޮވާލައިފި އެވެ.
ރައީސުލްޖުމްހޫރިއްޔާ ކަން އެއް ދައުރު ކޮށްފައިވާ މީހަކަށް، މާލީ އިނާޔަތެއްގެ ގޮތުގައި ކޮންމެ މަހަކު 50،000 ރުފިޔާ ދައުލަތުން ދޭން ވާނެ ކަމަށް ގާނޫނުގައި ބުނެފައިވެ އެވެ. އަދި ކުރީގެ ރައީސުން ދިރިއުޅުއްވާ ތަނުގެ ހަރަދަށް މަހަކު 50،000 ރުފިޔާ ވެސް ލިބިވަޑައިގަންނަވަ އެވެ.
އޭގެ އިތުރުން ރައީސުލްޖުމްހޫރިއްޔާ ކަން ކޮށްފައިވާ މީހަކު މުޖުތަމައުއަށް ފައިދާހުރި އިޖުތިމާއީ މަސައްކަތްތައް ކުރުމަށްޓަކައި އެމީހަކު ބޭނުންވެއްޖެ ހިނދެއްގައި، މަސައްކަތް ކުރާނެ އޮފީހަކާއި، މުވައްޒަފުންނާއި، އެހެނިހެން ކަންތައްތައް ހަމަޖެއްސުމަށްޓަކައި، މަހަކު 175،000 ރުފިޔާއަ ހަމައަށް ދައުލަތުން ފައިސާ ހަމަޖައްސައިދޭން ވާނެ ކަމަށް ބުނެފައިވެ އެވެ.
މަޖިލީހުގެ ޖަލްސާގައި ވާހަކަދައްކަމުން މުހައްމަދު އިސްމާއިލް ވިދާޅުވީ ރާއްޖޭގައި ވެރިކަން ކުރެއްވި ކޮންމެ ބޭފުޅަކު ވެސް ވެރިކަމުން ދުރަށް ވަޑައިގެންނެވީ ދައުލަތް ދިރުވާލުމަށްފަހު ކަމަށާއި އެމްއެމްއޭގެ ތިޖޫރީ ހުރި ތަނުގައި ވަޅުގަނޑު ވެސް ނެތް ކަމަށެވެ. އަދި ދައުލަތުން ކުރީގެ ރައީސުންނަށް ދެމުން އަންނަ އިނާޔަތްތައް ކުޑަކުރަންޖެހޭ ކަމަށް ވިދާޅުވި އެވެ.
"ހަތަރު، ފަސް ލައްކަ ރުފިޔާ ނަގައިގެން ގޮސް އިނގިރޭސިވިލާތުގައި އެކަކު، ޖަރުމަނުގައި އަނެކަކު ގޭގައި ބޮޑު ގޮޅިއެއް ހަދައިގެން ހަމަ ކޮންމެ ރެއަކު ފުރޮންޓޭ، މުރޮންޓޭ އުރޮންޓޭ ކިޔައިގެން ޖަލްސާ ބާއްވަނީ،" މުހައްމަދު އިސްމާއިލް ވިދާޅުވި އެވެ.
މުހައްމަދު އިސްމާއިލް ވިދާޅުވި ގޮތުގައި ކުރީގެ ރައީސުން ގައުމު ފަސާދަަކޮށް ރައްޔިތުން ބައިބައި ކުރަން ނޫނިއްޔާ ކުރި މަސައްކަތެއް ނެތެވެ. އަދި ދައުލަތުން މި ބޭފުޅުންނަށް އިނާޔަތް ދޭންޖެހޭ ސަބަބާއި މެދު ސުވާލު އުފައްދަމުން އޭނާ ވަނީ ނައިބު ރައީސްކަން ކުރައްވާފައި ތިއްބެވި ބޭފުޅުންނަށް އިނާޔަތް ނުދިނުމަކީ ހަމަޖެހޭ އުސޫލެއް ނޫން ކަމަށްވެސް ވިދާޅުވެފަ އެވެ.