ބޮލީވުޑްގެ ކުޅަދާނަ ޑައިރެކްޓަރު ރާޖްކުމާރު ހިރާނީގެ ދެ ފިލްމެއްގައި ސަޕޯޓިން ރޯލުތަކެއް ކުޅުނު ޒުވާން އެކްޓަރު ވިކީ ކޯޝަލަށް އޭނަގެ ފިލްމަކުން ލީޑް ރޯލު ހުށަހަޅާފައިވާ ކަމަށް ރިޕޯޓްުތައް ބުނެފި އެވެ.
ޓެލީ ޗައްކަރުން ބުނީ މި ފިލްމަކީ ހިރާނީގެ އަލަތު ވެބް ސީރީޒް "ޕްރިތަމް ޕެޑްރޯ" އަށް ފަހު ހަދަން ޕްލޭންކުރާ ފިލްމު ކަމަށެވެ. އެގޮތުން ވިކީ އަށް ފިލްމު ހުށަހަޅައި އެކަމާ ގުޅޭ މަޝްވަރާތަކެއް ވެސް ކުރެވިފައިވާ ކަމަށް އެ ނޫހުން ބުންޏެވެ. ނަމަވެސް އާ ފިލްމާ ބެހޭ އިތުރު އެއްވެސް ތަފުސީލެއް އަދި ނުލިބެ އެވެ.
މިދިޔަ އަހަރު ރިލީޒްކުރި ޝާހްރުކްގެ "ޑަންކީ" ގެ އިތުރުން 2018 ގައި ރިލީޒްކުރި ރަންބީރް ކަޕޫރްގެ "ސަންޖޫ" ގެ ސަޕޯޓިން ރޯލުތަކެއް ވިކީ ކުޅުނެވެ. އެ ދެ ފިލްމުގައި އޭނަ ކުޅުނު ކެރެކްޓާތައްވީ ބެލުންތެރިންގެ މެދުގައި ވަރަށް މަގުބޫލު ރޯލުތަކަކަށެވެ. "ޑަންކީ" ގައި ވިކީ ކުޅުނު ރޯލަށް މި އަހަރުގެ ފިލްމުފެއާގައި އެންމެ މޮޅު ސަޕޯޓިން އެކްޓަރުގެ އެވޯޑް ވެސް ލިބުނެވެ.
މަޝްހޫރު ބަތަލާ ކެޓްރީނާ ކައިފްގެ ފިރިމީހާ އަކީ މިހާރު ބޮލީވުޑްގައި ތިބި ޒުވާން އެކްޓަރުންގެ ތެރެއިން އެންމެ ހުނަރުވެރި އަދި އެންމެ ކާމިޔާބު އެކެކެވެ. ނެޝަނަލް އެވޯޑް ވެސް ހޯދާފައިވާ ވިކީގެ އެންމެ ފަހުގެ ފިލްމަކީ ޖުލައިގައި ރިލީޒްކުރި "ބޭޑް ނިއުސް" އެވެ.
އޭނަގެ ކުރިއަށް އޮތް ފިލްމަކީ އަންނަ ތާރީހީ ހަނގުރާމަ ފިލްމު "ޗާވާ" އެވެ.
ޑައިރެކްޓަރު ސަންޖޭ ލީލާ ބަންސާލީގެ "ލަވް އެންޑް ވޯ" ގެ ޝޫޓިން ވިކީ މާދަމާ ފަށާނެ އެވެ. އޭގެ ކާސްޓްގައި ރަންބީރް ކަޕޫރާއި އޭނަގެ އަންހެނުން އާލިއާ ބަޓް ވެސް ހިމެނެ އެވެ.