މިހާރު ކުޅޭނެ ފިލްމެއް ނުލިބޭ ބޮލީވުޑްގެ އެކްޓަރު ގޯވިންދާ އަށް އާ ފިލްމެއްގެ މަސައްކަތް ފެށުމުގެ އާވެއްޖެ އެވެ.
މީޑިއާތަކުން ރިޕޯޓްކޮށްފައިވާ ގޮތުގައި މީގެ 18 އަހަރު ކުރިން އޭނަ އާއި އަކްޝޭ ކުމާރު ކުޅުނު ޑައިރެކްޓަރު ޕްރިޔަދަރުޝަންގެ ކޮމެޑީ ފިލްމު "ބަގަމް ބާގް" ގެ ރައިޓްސް، އެ ފިލްމު އުފެއްދި ޝެމަރޫ އިން އަކްޝޭ ގަނެ، އޭގެ ދެވަނަ ބައެއް ހަދަން މިހާރު ވަނީ މަސައްކަތްތަކެއް ފަށައިފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި އަކްޝޭ މިހާރު ވަނީ ދެވަނަ ބައިގެ ސްކްރީންޕްލޭ ވެސް ރައިޓަރުންތަކަކާ ހަވާލުކޮށްފަ އެވެ. އަދި 2006 ގެ "ބާގަމް ބާގް" އާ އެއްގޮތަށް އާ ފިލްމުގެ މައިގަނޑު ކާސްޓްގައި ވެސް ހިމެނޭނީ އޭނަ އާއި ގޯވިންދާގެ އިތުރުން ޕަރޭޝް ރާވަލް އެވެ.
"ބަގަމް ބާގް 2" ގެ ޑައިރެކްޝަން އަކްޝޭ ހަވާލުކުރަން ނިންމާފައި ފުރަތަމަ ބައި ވެސް ހެދި ޕްރިޔަދަރުޝަނާ އެވެ. ފާހަގަކޮށްލެވޭ ކަމަކީ އެ ދެ މީހުން މިހާރު ވެސް އާ ޕްރޮޖެކްޓެއްގެ މަސައްކަތް ފަށަން ތައްޔާރުވަމުން އަންނަ ކަމެވެ. އެއީ އަންނަ އަހަރު ގެނެސްދޭން ހަމަޖެހިފައިވާ ހޮރޯ-ކޮމެޑީ "ބޫތު ބަނގްލާ" އެވެ.
"ބަގަމް ބާގް 2" ގެ މަސައްކަތް އަންނަ އަހަރުގެ ފަހުކޮޅު ފަށައި، ބެލުންތެރިންނަށް ފިލްމު ގެނެސްދޭން ޕްލޭން ކުރަނީ 2026 ގަ އެވެ.
އަށްޑިހައިގެ ތެރޭގައި ބޮލީވުޑަށް ނުކުމެ ނުވަދިހައިގެ ތެރޭގައި ވަރަށް ކާމިޔާބު ގިނަ ފިލްމުތަކެއް ކުޅެފައިވާ ގޯވިންދާ އަށް ފިލްމެއްގެ އުންމީދު އާވި އިރު، އޭނަ އަށް މި ފަހުން އެއްވެސް ފުރުސަތެއް ނުލިބޭތީ ބޮލީވުޑް ބައެއް މީހުން ދެކެ ހުންނަނީ ހިތްހަމަނުޖެހިފަ އެވެ.
ކޮމެޑީ ރޯލުތަކާއި ނެށުމަށް މޮޅު 60 އަހަރުގެ އެކްޓަރު އެންމެ ފަހުން ކުޅުނު ފިލްމަކީ ބަލާނެ ބަޔަކު ނުވި 2019 ގެ "ރަންގީލާ ރާޖާ" އެވެ.