ގެވެށިއަނިޔާ ހުއްޓުވުމުގެ ޤާނޫނަށް އިޞްލާޙު ގެނައުމުގެ ބިލްގެ ވެލިޑޭޝަން ބައްދަލުވުން ބާއްވައިފި އެވެ.
އިއްޔެ މި ވެލިޑޭޝަން ބައްދަލުވުމަކީ 2012 ގައި އަމަލު ކުރަން ފެށި ގެވެށިއަނިޔާ ހުއްޓުވުމުގެ ޤާނޫނު ތަންފީޒު ކުރުމުގައި ގޮންޖެހުންތަކެއް ހުރުމުގެ ސަބަބުން، ޤާނޫނަށް ގެންނަން ފެންނަ މުހިންމު އިޞްލާޙުތަކެއް ދެނެގަނެވި އެތައް މަޝްވަރާތަކެއް ކުރުމަށްފަހު، ބޭއްވުނު ބައްދަލުވުމެކެވެ.
ސޯޝަލް އެންޑް ފެމިލީ މިނިސްޓްރީން ބޭއވްި އްދަލުވުމުގައި ކަމާގުޅުން ހުރި މުއައްސަސާތައް ބައިވެރިވި އެވެ.
އެ ބައްދަލުވުމުގައި ގެވެށިއަނިޔާ ހުއްޓުވުމުގެ ޤާނޫނަށް ގެނައުމަށް ހުށަހަޅާ އިޞްލާޙުތަކުގެ ތެރެއިން، ގެވެށި ގުޅުމާއި، ގެވެށި އަނިޔާގެ ޢަމަލުތަކާއި، ކުށާއި އަދަބާ ގުޅޭ ގޮތުން މަޝްވަރާކޮށް، މަޝްވަރާކުރެވުނު ކަންކަން ހުށަހަޅާފައިވެ އެވެ. އަދި ގެވެށިއަނިޔާ ހުއްޓުވުމުގެ ޤާނޫނަށް ގެނައުމަށް ހުށަހަޅާ އިޞްލާޙުތަކުގެ ތެރެއިން، މުއައްސަސާތަކުގެ ދައުރު ވެސް ބައްދަލުވުމުގައި ވަނީ މަޝްވަރާކޮށްފައެވެ. އެގޮތުން ދިވެހި ފުލުހުންގެ ޚިދުމަތާއި، ޕްރޮސެކިއުޓރ ޖެނެރަލްގެ އޮފީހާއި، އިޖުތިމާޢީ އަދި ޞިއްޙީ ޚިދުމަތުގެ ދާއިރާގެ އިތުރުން، ފެމިލީ ޕްރޮޓެކްޝަން އޮތޯރިޓީގެ ދައުރަށް އަލިއަޅުވާލާފައިވެ އެވެ.
މީގެ އިތުރުން، ޤާނޫނީ ފަރުވާތަކާއި ކޯޓުތަކުގެ އިޖުރާއަތުތަކުގެ ތެރެއިން، ރައްކާތެރިކުރުމުގެ އަމުރާއި، ރައްކާތެރިކުރުމުގެ އަވަސް އަމުރާއި، ތަފްރީޤަށް ގެނެވޭ އިޞްލާޙުތައް ވެސް މަޝްވަރާކޮށްފައިވެ އެވެ.
ގެވެށިއަނިޔާގެ މައްސަލަތަކުގައި މަސައްކަތްކުރާ ނިޒާމުގައި، ނިޒާމީ ގޮތުން ހުރި ހުރަސްތައް ނައްތާލުމަށްޓަކައި، ގެވެށިއަނިޔާ ހުއްޓުވުމުގެ ޤާނޫނު ވުޖޫދުވުމުގެ މަޤްޞަދު ހާޞިލުކުރުމަށްޓަކައި ޤާނޫނުގެ ރޫޙާ އެއްގޮތަށް ނިޒާމު ބަދަލުކޮށް، ފެމިލީ ޕްރޮޓެކްޝަން އޮތޯރިޓީ (އެފްޕީއޭ) އަށް ދީފައިވާ ރެގިއުލޭޓަރީ ބާރުތައް ފުޅާކޮށް، އެތަނަކީ ގެވެށިއަނިޔާގެ މައްސަލަތަކަށް ފާރަވެރިވާނެ ޚާއްޞަ އިދާރާގެ ގޮތުގައި ހަމަޖެއްސުމަކީ ރައީސް ޑރ. މުޙައްމަދު މުޢިއްޒުގެ މުހިންމު ވަޢުދެއް ވެސް މެ އެވެ.
އެހެންކަމުން، މިއީ ގެވެށިއަނިޔާގެ މައްސަލަތަކުގައި މުޅި މި ނިޒާމް ހަރުދަނާކުރުމަށް އެޅޭ މުހިންމު ފިޔަވަޅަކަށް ވެގެންދާނެ އެވެ.