ދިވެހިންގެ ތެރޭގައި ކުރިން ވަރަށް ބޮޑު މަގުބޫލު ހޯދި ފިލްމު "އިހުސާސް" ގެ ޑައިރެކްޓަރު މުހައްމަދު ހިލްމީ ވަރަށް ޒަމާންތަކެއް ފަހުން އާ ފިލްމެއްގެ މަސައްކަތް ފަށައިފި އެވެ.
މި ފިލްމުގެ ނަމަކީ "ލަމްހާ" އެވެ. މި ފިލްމު ރޭ ވަނީ ރާއްޖޭގެ މަަޝްހޫރު ސްޓްރީމިން ޕްލެޓްފޯމް، ބައިސްކޯފުގެ އޮފީހުގައި ރަސްމީކޮށް ލޯންޗް ވެސް ކޮށްފަ އެވެ.
އެ ހަފުލާގައި ވަނީ ފިލްމުގެ ފަސްޓްލުކް ޕޯސްޓަރު ވެސް ދައްކާލައިފަ އެވެ.
ގާތްގަނޑަކަށް 35 އަހަރުގެ މެދުކެނޑުމަކަށް ފަހު ހިލްމީ ޑައިރެކްޓަރުގެ ގޮނޑި އަށް އަރާ ފިލްމުގެ ޓައިޓްލް ރޯލަށް ނަގާފައި ވަނީ މިހާރު ގިނަ އުފެއްދުންތަކުން ފެންނަ އަރަަމުން އަންނަ ބަތަލާ އައިޝާ އަލީއެވެ.
"ލަމްހާ" ގެ އިތުރު ކާސްޓުންގެ ތެރޭގައި އަހުމަދު ޝާރިފާއި ނުޒުހަތު ޝުއައިބު (ނުޒޫ) ގެ އިތުރުން އަހްމުދު އީސާ (އާނަންދު) ވެސް ހިމެނެ އެވެ.
އިންޑިއާގެ މީހަކު ފިލްމު ކެމެރާކުރާ އިރު، ފިލްމުގެ މޭކަޕް ހަވާލުކޮށްފައި ވަނީ ސްރީ ލަންކާގެ މީހަކާ އެވެ.
ހިލްމީގެ "އިހުސާސް" އަކީ އިސްމާއީލް ވަޖީހު ލީޑް ރޯލު ކުޅުނު ފިލްމެކެވެ. އޭގެ ކާސްޓްގައި ރީކޯ މޫސާ މަނިކް ވެސް ހިމެނެ އެވެ. ހިލްމީ ލިޔެ، ޑައިރެކްޓްކޮށް މާޕާ އިން ޕްރޮޑިއުސްކުރި "އިހުސާސް" ރިލީޒްކުރީ 1993 ގަ އެވެ.
ފިލްމު "ޗުއްޓީ" ވެސް އުފެއްދި ހިލްމީ އަކީ ކުރީގެ މަޝްހޫރު ޅެންވެރިޔާ ޑޭޒީމާ ފާއިޒާގެ ދަރިއެކެވެ.