މާލެ އާއި ވިލިމާލޭގެ މަގުތައް އަލުން ތަރައްގީ ކުރުމުގެ މަޝްރޫޢުގެ ފީސިބިލިޓީ ދިރާސާ އަށް ޗައިނާގެ ޓީމެއް ރާއްޖެ އައިސް މަސައްކަތް ފަށައިފި އެވެ.
މަސައްކަތް ފެށުމުގެ ކުރިން އެ ޓީމު ކޮންސްޓްރަކްޝަން މިނިސްޓްރީގެ އިސްވެރިންނާ ބައްދަލުކޮށް މަޝްވަރާތަކެއްކޮށްފައިވެ އެވެ.
ޗައިނާ ޓީމްގެ މި ދަތުރުގައި މި މަހުގެ 21 އާ ހަމައަށް މަޝްރޫއާ ގުޅުން ހުރި ފަރާތްތަކާއި މަޝްވަރާކުރުމާއި، ސައިޓް ސާވޭތައް ހެދުމާއި، މަޢުލޫމާތު އެއްކުރުމުގެ މަސައްކަތް ކުރިއަށް ގެންދާނެ އެވެ.
މި މަޝްރޫޢުގެ ދަށުން ކުރެވޭ މަސައްކަތްތަކުގެ ތެރޭގައި މާލޭގެ މަގުތަކުގެ ޙާލަތު ދެނެގަތުމާއި، މަގުތަކުގެ ފެންވަރު ރަނގަޅުކުރުމަށް ބޭނުންވާ ކަންކަން ފާހަގަކުރުން ހިމެނެ އެވެ. މީގެ އިތުރުން، މަގުތަކުގެ ޓްރެފިކް ފްލޯ އަދި ޕާކިންގ ނިޒާމު ހަރުދަނާކުރުމަށް ބޭނުންވާ ބަދަލުތައްވެސް މި ދިރާސާގެ ތެރެއިން ފާހަގަ ކުރެވޭނެ އެވެ.
މި ފީސިބިލިޓީ ދިރާސާ އަކީ ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދާ މި މަޝްރޫޢުގެ ޑިޒައިން އަދި ޕްލޭނިން މަސައްކަތްތަކުގެ އަސާސް ކަމަށް ވާނެ ކަމަށް މިނިސްޓްރީން ބުންޏެވެ.
މި އަހަރުގެ ކުރީކޮޅު ޑރ. މުޙައްމަދު މުޢިއްޒު ޗައިނާ އަށް ކުރެއްވި ދަތުރުގައި ޗައިނާ ސަރުކާރުން ރާއްޖެއަށް ދޭން އެއްބަސްވި ހިލޭ އެހީގެ ބޮޑު ބައެއް ހޭދަކުރަން ނިންމަވާފައި ވަނީ މާލެ އާއި ވިލިމާލޭގެ މަގުތައް އަލުން ތަރައްގީ ކުރުމަށެވެ.